29 January | Teboho Jafeta

Banna ba ntšoa M2 500 ea Mpesa hanong

MASERU - Banna ba babeli, oa Nazareth, Maseru, ea lilemo li 22 le letsoalloa la naha ea Zimbabwe le lilemo li 24 le lulang hona Nazareth moo, ba qhaulitsoe ke sepolesa ka pelaello ea bosholu ba bomenemene.

Sena se hlahelletse litlalehong tsa sepolesa tsa beke le beke ntlo-kholo ea Sepolesa sa Lesotho, Maseru. 

Phala ea Sepolesa sa Lesotho, Superintendent Mpiti Mopeli, o hlalositse ha litlaleho li supa hore banna bana  ba ile ba ea khoebong e ‘ngoe moo e sebetsanang le tšebeletso ea ho romella le ho fumana chelete ka marangrang a Mpesa.

Linokoane tsena sepolesa se re li ile tsa ntša chelete e M20, tsa nto fetola molaetsa romelloang mohaleng oa letsoho ho pakahatsa thomello kapa ho ntša chelete ho o etsa M2 500; ba ile ba bontša mosebeletsi oa khoebo molaetsa oo ‘me ba batla chelete eo e M2 500 ea bolotsana.

Ke moo morekisi a ileng a ba latola a supa hore chelete e kaalo ha e so ntšoe, moo ba ileng ba re mohlomong marangrang ana le mathata.

Morekisi hang a be a se a eba le pelaelo ‘me a qhoaela ba kompone ea Vodacom, e laolang litšebeletso tseo tsa Mpesa; Vodacom e ile ea hlalosa hore hore ha ho e-so be le molaetsa oa mofuta o joalo eaba ho se ho hlabeloa sepolesa paatsana – ‘me ho fihleng ha bona a tšoara banna bana.

Litlaleho li supa ha banna ba ehlile ele likena-morung tse sebetsang ka eona tsela ena ho itjella lichelete tsa batho, ‘me ba haharile chelate ea Basotho libakeng tsa sebetsa ka eona tsela ena libakeng tsa Semonkong, Maputsoe le Roma.

Litaba Tse Ling