27 January | Teboho Jafeta

Mokhatlo oa Basketball o khutlisetsa sechabeng

MASERU - Mokhatlo oa papali ea basketball o tla tšoara lipapali e le ho bokella chelete e tla thusa morerong oa ho khutlisetsa sechabeng. Lipapali tsena li tla tšoaroa ho tloha ka Moqobelo ho isa Sontaha mabaleng a Lehakoe a lipapali, Maseru.

Raliphatlalatso oa mokhatlo, Hopolang Hoala, o re sepheo sa mantlha sa ho tšoara lipapali tsena ke ho bokella chelete e tla thusa ho reka thepa ea bana ea sekolo, ’me e fuoe bana ba tla hloauoa ke mokhatlo.  O boetse a supa hore lipapali tsena li buletsoe lihlopha tsohle, ekaba tsa ka hare le kantle ho naha. “Re buletse lihlopha tsohle tse ka bang le khahleho ea ho tla inonya matla e le ho itlhophela selemo sena sa lipapali,” o rialo Hoala.

 O bile a eketsa ka hore mokhatlo o hlophisa lipapali tsena ebile e le mokhoa oa ho holisa papali kaha libapali ha li bapala khafetsa li ba boemong bo hlokahalang. H’a tsoelapele Hoala o bontšitse hore mokhatlo o lebelletse hore sechaba se ba phallele ka chelete, seaparo sa sekolo, lieta tsa sekolo le sohle se ka thusang barutoana. O bile a hlakisa hore mokhatlo o khethile Tumelo Mara hore ebe eena ea tla hlophisa lipapali tsena ka kakaretso. “Re khethile Tumelo Mara ho ikarabella lipapaling tsena, ’me o bontšitse hore o tla re fa hore na batšehetsi ba lipapali ke bo mang pele li thakhoha,” a rialo. 
 

Metro News Digital

Fumana Koranta Ea Hao Mahala

Sehlopha se ngolisa ka M500, ’me sehlopha se tla hapa lipapali tsena se tla kibakiba ka M2,000, ha se tla hlaha boemong ba bobeli se tla putsoa ka M800.  Lipapali tsena li ne li lokela hore ebe li tšoeroe ka la 11 ho isa la 12 Pherekhong, empa tsa chechisoa e le ha mokhatlo o fa lihlopha tse ling monyetla oa ho ingolisa. Lihlopha tse kenetseng lipapali tsena monongoaha tsa basali ke Bokamoso North, Machabeng, Fokothi, Shooting Rifles, Rovers le Redskins. Ka ho banna ke Bokamoso Alumni, Bokamoso South, Fokothi, T98ERS, KTA, Khubestate, Rovers, Buffalos le Machabeng. Ngoahola lipapali li ne li haptjoe ke sehlopha sa Bokamoso North ho basali, ha ka banneng ho ile ha hapa Maseru Bloos.

Litaba Tse Ling