Lipapali|November 25, 2013 4:12 pm

Komiti e hlophelang COSAFA e ntša tlaleho

COSAFA

Ka Napo Lekhooana
MASERU – Komiti ea tokisetso ea lipapali tsa COSAFA e ntšitse ntlha-kemo ea litaba kamoo li leng ka teng malebana le ho tla tšoaroa hoa lipapali tseo ka har’a naha ea Lesotho.
Molula-setulo oa komiti eo Monghali Lebohang Thotanyana ’moho le moifo oa hae ba ile ba hlakisa kamoo litaba li tsamaileng le hore na meralo e teng ke efe.
Thotanyana o supile hore mabala a tlil’o sebelisoa bakeng sa lipapali tseo tse salletsoeng ke matsatsana a se makae pele li thakhoha, ke lebala le leholo la Setsoto le lebala la Mafeteng la Leshoboro Seeiso. O re ba entse sohle se matleng a bona hore ba bone hore lebala leo le’a phetheloa lehoja le ntse le e-s’o qetoe hantle.
Mabala a hlalositsoeng e le a tlil’o sebelisoa sebakeng sa boikoetliso ba lipapali, ke a mane e leng a Setsi sa Tlhabollo ea Batšoaruoa (LCS), Bambatha Tšita, Sekolo sa Koetliso ea Mapolesa (PTC) ’me lona le kenyellelitsoe joalo e le le tlang ho sebelisoa sebakeng sa lebala la Maseru la Lipitso.
“Lebala lena la Lipitso la Maseru, ho tlile tlhokomelong ea rona hore le siuoe ke nako kaha le ntse le le tlas’a tokiso e matla ’me lipapali li se li le haufi. Tšitiso e ’ngoe e kholo ke ea hore k’hamphani ea Metsi le Likhoerekhoere (WASCO) le ’Masepala, ho na le moo ba ’nileng ba kolotana metsi, ’me ho noesetsoa hoa mohloa oo ha e ea ba ho nepahetseng. Feela hona ha ho hlalose hore lebala leo le tla tlohelloa, tokiso ea lona e tla ’ne e tsoele-pele,” ho rialo Thotanyana.
Taba ea bolulo ba lihlopha e hlalositsoe le eona e se e nepahetse. Empa komiti eo ea litlhophiso e hlalositse ha qholotso eo ba tobaneng le eona e le ea matsatsi ao COSAFA e supileng e le ao lihlopha li tlang ho fihla ka ’ona.
“Khang ke hore ho na le lihlopha tse tlang ho fihla kapele, joale li tla fihla pele ho nako eo li e behetsoeng matlong a tsona a boroko, ’me likhakanyo tsa rona tsa lichelete li tla eketseha,” ke Thotanyana eo.
Komiti ka phala ea eona Khethiwe Makara e hlalositse ha litaba tse kang tsa lipalangoang, Seea-le-moea-pono le eona taba ea boroko li tlil’o sebetseha ka pheiso ea chelete eo ’muso oa Afrika Boroa o faneng ka eona.
Tlaleho e boetse ea supa hore lipapali ho ntse ho lebeletsoe hore e tlil’o ba tse atlehileng haholo kaha bo-rakhoebo ba hlile ba ikakhetse ka setotsoana ho tšehetsa lipapali tseo ’me chelete e reretsoeng ho sebetsana le lipapali tseo ke M25 milione. Lipapali li lebeletsoe ho thakhoha ka la 3 Tšitoe.

  • Share this post:
  • Facebook
  • Twitter
  • Delicious
  • Digg