Lipapali, Litaba|November 25, 2013 3:58 pm

LSRC e makalla lekala

LSRC-1

Ka Napo Lekhooana
MASERU – Komisi ea Lesotho ea Lipapali (Lesotho Sports and Recreation Commission – LSRC) e makalletse khato e nkiloeng ke Lekala la Lipapali ea ho ngolla Mokhatlo oa Lefatše oa Papali ea bolo ea maoto (FIFA) ho bolela ka bobolu bo mokhatlong oa papali ea bolo ea maoto Lesotho (LeFA).
Litho tsa komiti ea LSRC tse tšoentsoeng ke khato ena ea lekala li kenyeletsa ’Muelli Phelane Phomane e le motsamaisi oa Komisi ebile e le mongoli-kakaretso, Khalanyane Lehora e le motlatsi oa mongoli le Jobo Rasoko e le phala ea LSRC. Komiti e hlalosa hore lengolo leo lekala le le ngolletseng FIFA, le bontša ha komiti ea LeFA e khethetsoeng ho tsamaisa papali ea bolo ea maoto, e khethiloe ka bobolu le hore lipapali tsa Lesotho li tlokotsing.
LSRC e boetse e re e makalletse litaba tse hlahang lengolong hobane eona e le ’mamekhatlo ea lipapali Lesotho e ne e qala ho tseba ka tsona ha e li balloa ho tsoa lengolong leo le ngolletsoeng FIFA. Kahona, eona e ea ikhula litabeng joalokaha e tlolisitsoe mahlo holimo ke lekala.
Rasoko o re LSRC ke komisi e reretsoeng ho tsamaisa le ho rarolla mathata ’ohle a ka bang teng lipapaling ka hare ho naha. O re LeFA ke setho se oelang tlas’a LSRC, ’me ba makalla ha lekala le se le nkile khato ea ho etsa lengolo le eang ho FIFA empa LSRC e sa tsebe letho ka litaba tse joalo.
“Re makala tjena rona LSRC, re le batšepuoa ba pele ba molao, re hlaha re le babalisuoa feela kapa baqopiletsuoa ba lengolo leo, leo re bonang lekala ka letona la lona le le ngolletse FIFA. E ea makatsa hoba litaba ha e ne e-ba li teng, lekala le ne le sa lokele hore ebe le se le ngolletse FIFA lengolo leo le e-s’o fete ho rona koano,” ho rialo Rasoko.
Rasoko o tsoela-pele hore ha ho moo lekala le lokelang ho tsamaisa mekhatlo ea lipapali. A re ha ho na matla a molao ao lekala le a fuoeng ho tsamaisa litaba tsa lipapali.
Ka lehlakoreng la lekala, Mongoli e Moholo oa lona Dr Majara Molapo ka bokhutšoanyane o ile a re litaba tseo Rasoko a li buileng ha se tsa ’nete tsa hore ba ba potile kathoko. O re tšebelisano ea bona ha se e mpe.

  • Share this post:
  • Facebook
  • Twitter
  • Delicious
  • Digg