Khoebo, Litaba|November 25, 2013 10:52 am

Khoebo e hloka ho itima boroko

Cake1
Ka Lerato Buthelezi

MASERU – Mofumahali ’Mantšepase Thato Matete ea lilemo li 26, o re motho o lokela ho itima boroko hafeela a batla khoebo ea hae e atlehe.

Matete o sebetsa e le mohlabolli empa honajoale o ikakhetse ka setotsoana ho phehela batho bohle ba hlokang likuku tsa manyalo le mekete e meng ho ea ka litlhoko tsa bona, ’me ke likuku tsa boleng bo phahameng haholo.

“Ke ithutile ho pheha ha ke ntse ke le sekolong moo re neng re etsa thuto ea lijo le phepo. Ho tloha moo, esale ke na le thahasello e kholo ea ho pheha likuku. Ke nakong eo ke neng ke ntse ke emetse ho ea junifesithing, ha ke qalella ho thusa batho ba neng ba sebetsa mosebetsi ona oa ho pheha likuku.
Ha ke’a o ela sekolong,” a rialo Mofumahali Matete.
O re h’a ne a le sekolong, o ne a kena le moitlami e mong ea neng a se ntse a tseba mosebetsi ona, haholo oa ho pheha likuku tsena tse kholo le ho li khabisa. A re o ile a iqalla ho etsa tsa hae ka 2011 le ho khabisa haeba a memiloe meketeng.
“Kaha ho na le moo ke hiriloeng ke sebetsang teng, mosebetsi ona oa ka, ke o etsa ka nako ea mafelo a beke kapa bosiu hobane ha motho a batla ho etsa chelete e ’ngoe ka thoko molemong oa ho phela le ba lelapa la hae, o leka ka tsela tsohle ho bona hore taba ea boroko eona e tla qetellong.

“Ha motho a batla ho etsetsoa kuku, o lokela ho etsa kopo e joalo libeke tse tharo pele a e sebelisa. Lebaka le leholo ke hobane kuku eo e lokela hore pele e khabisoa hantle e be e folile. Leha e qeta ho khabisoa, motho ea joalo a se ke a e nka hobane e tlil’o siea menoana moo a e tšoereng,” a rialo Matete.
O re lisebelisoa o itatela tsona Mangaung, Afrika Boroa hoba li batla li e-s’o be mpe haholo ka litjeo.
A tsoela-pele ka hore honajoale o ntse a sebeletsa lapeng, ’me h’a e-s’o fumane sebaka seo a sebeletsang ho sona. A re h’a e-s’o be le ’maraka ka ntle ho naha ea Lesotho.
A eketsa ka hore o rerile hore h’a qeta lithuto tsa hae tsa ho etsa lengolo la ‘Masters’ ho tloha ka 2016 ho isa 2017, ke hona a tlang ho bona hore na o qala khoebo e kholo kae, empa a ntse a sa tlohelle mosebetsi oa hae, hobane oona o itse o o rata haholo.

“Leha mosebetsi oa ka o bonahala o mphathahanya haholo, ke ntse ke na le nako ea lelapa la ka kaha ke na le ngoana ea selemo le likhoeli tse tharo le molekane, ’me ke batho ba bohlokoa bophelong ba ka. Ke lokela hore ke ba fe nako. Hantle ha ke rata ho etsa ntho kapa ho e tseba, ke e latella hore ke iphe nako ea ho e sheba na e entsoe joang ebe ke etsa eona ntho e tšoanang joalo ka ho khabisa,” ke eena eo.
Ha a fera Matete o itse hangata litabeng tsa tšebetso ea hae o beha Molimo kapele hobane o mo tšepile hore h’a mo behile ka pele, o tla mo etsetsa tsohle.

  • Share this post:
  • Facebook
  • Twitter
  • Delicious
  • Digg