Lipapali, Litaba|November 20, 2013 3:46 pm

Lipalami li nyamelloa ke lithuthuthu

775041_10152048692810575_1733666764_o

Ka Moluoane Shale
MASERU – Lipalami tse ’ne li setse li ithoetse meli lihloohong ke ho hloleha ho kenela mojao oa lithuthuthu kamor’a hore lipalangoang tsa tsona li utsuoe pele ho thakholoa mojao oa ‘Roof of Africa Rally’ libakeng tse fapakaneng tsa lihotele Maseru.
Lithuthuthu tse peli li nyametse Lesotho Sun ka Laboraro ha tse ling tse peli li metse maoto letsatsing le hlahlamang Maseru Sun. Lipalami tsa tsona li hlotsoe ho kenela mojao o neng o hahlaula le libaka tse ling tsa naha ea Lesotho ho tloha ka la 14 Pulungoana ho fihlela ka la 16 Pulungoana.
E mong oa lipalami Malcolm Joubert ea neng a le Maseru Sun o boletse ha lithuthuthu li utsoitsoe ka koloi ea Land Cruiser. O re koloi ena e fihlile e khannoa ke ngoan’e mosoeu. A re khopolo ea bona eaba hore monna eo oa Lekhooa ke e mong oa bathusi ba ntseng ba tsamaea le tse ling tsa lipalami eaba bohle ha ba mo natse joalokaha boholo bo sa tsebane ka lebaka la ho hlaha linaheng tse fapakaneng.
A re koloi eo e ne e bile e roetse linomoro-polata tseo e seng tsa Lesotho, ’me taba eo ea hla ea tiisa hore ke e mong oa karolo ea bona. O re athe linomoro tseo ke tsa mokunyata.
Joubert o tsoetse-pele ho hlalosa hore lithuthuthu tsena li nyametse lipakeng tsa hora ea pele bosiu le hora ea borobeli hoseng ka la 14. A re mokhoa oa ho tseba lithuthuthu tse ling tse peli ke oa hore se seng se ngotsoe ka pele 2012 KMT250 XCW-F, ’me nomoro polata ea sona ke 511. Se seng sona se ngotsoe 2002 KMT 200 EXC, ha linomoro tsa ’molobai oo li neng li palamisitsoe ho sona e le WLJ030GP. “Bobeli ba tsona li ntse li le maemong a matle haholo,” ke eena eo a bolela tse utsoitsoeng Maseru Sun.
Mookameli oa sepolesa Maseru Central, Superintendent Mofokeng Kolo, o hlaloselitse Mosotho hore taba e joalo e fihlile sepoleseng sa habo. O supile hore ka 8:30 bosiu ka la 13 koloi e ile ea tsoa Lesotho Sun e hula ’molobai o palamisitseng lithuthuthu. A re eaba ka bo 2: 30 hoseng ka la 14 eaba koloi eo e bonoa e tsoa e ntse e hakile ’molobai o tšetseng lithuthuthu tse ling tse peli. O itse motšeare oa Labone ke ha ho fumaneha ’molobai oa tse utsoitsoeng Maseru Sun o nyahlalitsoe lebaleng la Fokothi holim’a noka ea Mohokare.
“O ile oa isoa sepoleseng hore beng ba oona ba il’o o tseba,” ke Kolo eo.
Potsong ea hore ho tlile joang hore lesholu le se ke la bonoa empa lihotele li e-na le lik’hamera, Kolo o itse lesholu lena le ne le tsamaea ka koloi e lifensetere li lefifi, ’me ho se bobebe ho bona ka hare ho koloi. A re hape le ne le butse fensetere hanyane le sa hlahella haholo.
Potsong e ’ngoe ea hore teng nako eo a leng fatše ho haka ’molobai koloing ea hae h’a bonoa ke’ng, Kolo o itse bona e le sepolesa ba se ba ntse ba etsa lipatlisiso ho fumana hore na hantle ho etsahetseng, ’me hajoale ha ho letho leo ba seng ba le fumane.

  • Share this post:
  • Facebook
  • Twitter
  • Delicious
  • Digg