Khoebo, Litaba|November 14, 2013 5:37 am

SACU e thakhola tšebelisano le bahoebi

M (3)

Ka Lerato Buthelezi
MASERU – Kopano ea Linaha tse Khoebong hloahloeng e ka Boroa ea Afrika (Southern African Customs Union – SACU) e thakhotse leano la bahoebi ba mebuso ea linaha tseo e leng litho tsa SACU le boemeli ba likhoebo ka Labohlano.
Mosebetsi ona o ile oa thakholoa ke Letona la Lichelete Dr Leketekete Ketso.
Ho ea ka Mofumahatsana Motena Tšolo eo e leng molula-setulo oa komisi ea SACU oa bangoli ba baholo ba makala a lichelete, thakholo ena e molemong oa hore ho lokisoe litaba tsa khoebisano haholo litabeng tse ka malibohong. Sena o re se tlisoa ke hore hangata ho bonahala ho e-na le bothata ba khoebo e lokolohileng ka malibohong.
“SACU selemong sena e keteka lilemo tse 103 e thehiloe ’me Lesotho esale e le setho sa eona. Likatleho le melemo eo naha ea Lesotho e e fumaneng moo, ke chelete e lebang ’musong. ’Me letsatsing lena naha ea rona ea Lesotho e motlotlo haholo hobane e hatetse-pele. Re na le likhoebo tse peli ka har’a naha ka mona tseo re ka li supang hore li ikobela melao le melaoana ea ka malibohong, nakong ea khoebisano, ’me sena se etsa hore re be motlotlo haholo”, a rialo Tšolo.
A tsoela-pele ka hore likhoebo tseo tse peli ke Pick’n Pay le Lesotho Flour Mills. O ekelitse ka hore ba boetse hape ba lebelletse hore le likhoebo tse ling le tsona eka li ka kopitsa litaba tsena tse ntle, tseo likhoebo tsena li li etsang li tlohelle bolotsana.
H’a lahlela molangoana oa hae litabeng tsena, mongoli e moholo oa SACU Mofumahatsana Tswelopele Moremi, o ile a hlalosa hore lilemong tsena tseo a seng a li sebelitse boemong boo, o bona linaha tsena tseo e leng litho li ntse li sebetsa hantle. A re ba motlotlo haholo hore ka selemo sa 2010, ba ile ba keteka lilemo tse 100 SACU e thehiloe. Hona joale ba ntse ba aha ntlo-kholo ea SACU Namibia.
H’a thakhola leano lena Dr Leketekete Ketso ebile e le Molula-Setulo oa K’hansele ea SACU, o ile a hlalosa hore hona e tla ba mosebetsi o motle haholo, kaha ho teng liqholotso tseo bahoebi ba ntseng ba e-na le tsona haholo ka malibohong. A re leano lena ke la pele le thakholoang ka hare ho naha ea Lesotho, molemong oa kholiso ea moruo oa naha.
’Moka ona e bile oa letsatsi le le leng, ’me linaha tseo e leng litho tsa SACU ke Botswana, Lesotho, Namibia, Afrika Boroa le Swaziland.

  • Share this post:
  • Facebook
  • Twitter
  • Delicious
  • Digg