Lipolotiki, Litaba|June 18, 2013 8:00 am

Moleleki le lilopo-emere

…o re Thabane o tlamurela baahloli

on_moleleki

 

Ka Lerato Buthelezi

MASERU ‑ Motlatsi oa Moeta-pele oa Lekhotla la Puso ea Sechaba ( DC), Monyane Moleleki, o makalitse baqolotsi ba litaba h’a re litho tsa habo ha li robale ka Ntlong ea Bakhethoa ka lilopo-emere.

Moleleki o buile taba-hali eo nakong ea kopano ea baqolotsi ba litaba ka Labohlano, Maseru setsing sa Mokhatlo oa Bophatlalatsi ba Litaba Lesotho (MISA – Lesotho) moo a reng bona ha ba ngale lipuisano litabeng tse amang sechaba.

Mokola, ka moo a reneketsoang ka teng, o re litho tsa habo tse etsang melao, ha li ngale kapa hona ho kena ka Ntlong eo li nkile lilopo-emere, li se li sa ee malapeng.

O alile leleme phate ka hore batho ba etsang  joalo, ba ee ba qetelle ba ntšitsoe kamoo ka ho kakasoa ke masole.

Kutloisiso e ne e le hore Moleleki o ne a hopola ha litho tsa bohanyetsi li ne li kakasoa ke litho tsa sesole ka Ntlong ea Bakhethoa lilemong tsa ho feta e le ha li bontša nyatso khahlanong le Motsamaisi oa mehleng oa Lipuisano, Ntlhoi Motsamai.

A tsoela-pele a re bona ha se batho ba khothaletsang mekoloko, ’me ha ho mohla ba tla hlasela tona-kholo “joalokaha ho ’nile hoa etsahala nakong ea ha Dr Pakalitha Mosisili e ntseng e le tona-kholo.”

A re bona e le bohanyetsi ka Paramenteng  ba entse ngatana-’ngoe le mokha oa Basotho Batho Democratic Party boeta-peleng ba Jeremane Ramathebane, ’me ba kenela lipuisano ka bongata.

Ramathebane eena o kene Ntlong eo ea Bakhethoa ka khekhethane.

“Rona re le Lekhotla la DC re ile ra nehelana ka puso hantle, re bile hape re ntse re kopa Molimo hore a fe batho bohle ba litulong boikokobetso ka nako tsohle. Pusong ena re lebeletse hore mali a bana ba Basotho a se ke a lula a tšoloha ka nako tsohle, empa se re makalitseng haholo ke hore re bona Tona-Kholo Dr Motsoahae Thabane a lula a tlamurela Baahloli ba Baholo ba makhotla a Lesotho. Taba ena e kotsi haholo ho sechaba sa Basotho le ho naha kaha joale e tla mo chesa,” a rialo Moleleki.

A supa ha se makalitseng DC e le hore hohle libokeng tsa mokha oa Kobo-Tata, Dr Thabane a lula a bua ka eena le Dr Mosisili, empa a lebetse hore bana ba seng ba le ka holimo ho lilemo tse 18 ba lokela hore ebe ba se ba ngolisitsoe, ebile ba se ba le bangata. Hape, Moleleki o supa ha ba setse ba eme le monn’a mateneng hore ebe setho sa Komisi e Ikemetseng ea Likhetho, Dr Fako Likoti, o se a setse a le mong.

Seo se latela ho hlokahala hoa setho sa mehleng sa komisi eo, Malefetsane Nkhahle, le ho fihlela pheletsong hoa tšebetso ea molula-setulo oa mehleng oa eona Limakatso Mokhothu.

Moleleki o bolela ba ingoaea lihlooho hore na taba eo e lebisa kae ha ho bonahala e sa sebetsoe.

“Re bile le ba bang lilemo tse fetang 10 ba seng ba le pusong honajoale, ’me re ea ipotsa hore na bona ha ba bona litaba li sa tsamaee hantle ba reng. Nka etsa mohlala ka Mohlomphehi Mothetjoa Metsing,  Letona Leketekete Ketso le Dr Timothy Thahane, ’me honajoale batho bao ba ea tseba hore ha mong’a lebatooa a ka hlokahala, ho lokeloa hore ho tšoaroe likhetho pele ho likhoeli tse robong, ’me honajoale mokhethoa oa Thaba-Moea Mohlomphehi Mokhokoli Seutloali o qeta ho hlokahala, empa ha re bone ’muso o litulong le IEC eka li tla etsa ka potlako hore ho be le likhetho sebakeng seo, e seng sona feela le Tele,” a rialo Moleleki.

Leha mekha e kang ea ABC le e meng e bile bohanyetsi Paramenteng e fetileng, Moleleki o supa ha e le pale hore ebe DC ke bohanyetsi ba molao.

O supa ha hajoale ho na le puso e kopanetsoeng ka har’a paramente kaha ho na le ‘maboloko’ esita le mokha o le mong o ikemetseng e leng oa Basutuland Congress Party. O re o amohetse koloi e teng e le moeta-pele oa mokha oa bohanyetsi ka moo, kaha a ’nile a bolelloa hore koloi e mo tšoanelang “e tla fihla kamor’a likhoeli tse tšeletseng.”

A ithoka ka hore ke bohanyetsi bo hloahloa. O re ba thehile seka-lekhotla la matona mokheng oa habo moo eena a “makileng Tona-Kholo Thabane” athe Pontšo Sekatle o alositse Motlatsi oa Tona-Kholo le Letona la Litaba tsa Puso ea Libaka, Mothetjoa Metsing, ha letona la Lipapali Thesele ’Maseribane, a alositsoe ke Mathibeli Mokhothu.

Athe mookameli oa MISA-Lesotho, Tsebo Matšasa, o itse e se e le selemo puso ea hajoale e le teng, ’me e kopanetsoe. A hopotsa hore e se e le lilemo tse 13 leano la bophatlalatsi le tekiloe pusong, empa ha ho e-s’o be letho le etsahalang.

O itse litšepiso tse ileng tsa etsoa ke mebuso e fetileng ea ho fetisa tokomane eo li bohotsoe ke lintja, kaha ho bonahala ba litulong ba lebala hang ha ba qeta ho se k’hoela.

 

  • Share this post:
  • Facebook
  • Twitter
  • Delicious
  • Digg

7 Comments

  • Che kannete mokola oa li hopola le tsona. Eke a ka li hopola kaofela.

  • Ele hore mokola ke eena feela ea etsang litaba? Ke rialo hobane haesale le bea taba tsa hae mona, haho bonahale le ikemiselitse ho bea litaba tse ntseng li etsahala. Kapa ba itse le se ke la mo tlosa. Che lea bora baqolotsi ba Mosotho.