Litaba|June 18, 2013 7:51 am

Bo-ramakoloi ba ema thabeng

on_Masepala o patalisa makoloi Maseru

 

Ka Napo Lekhooana

MASERU – Morero oa Lekhotla la Motse-Moholo Maseru (MCC) oa ho lefisa makoloi a emisoang libakeng tse malekana le ’mila o moholo oa King’s Way o bonahala o engoa thabeng ke bo-ramakoloi ba hanang ho lefa.

Ho lefisoa hona hoa makoloi ho qalile ka la 10 Phuptjane. ’Masepala o ne a ile a etsa phatlalatso ka phala ea lekhotla leo, Lintle Moerane, hore ho tla lefisoa makoloi ’ohle a pakoang ka thoko ho King’s Way e le ho leka ho felisa tšubuhlellano e bonahalang e iphile matla libakeng tseo.

Bekeng eo morero oo o kenang tšebetsong, ba MCC ba fetse ba beha bahlanka ba bona libakeng tseo hore ba lefise makoloi a siuoang moo.

Ha ho le joalo, basebetsi ba boikarabellong ba ho lefisa makoloi ba bonahetse ba le seboko sa hore a mang a makoloi a pakang libakeng tseo beng ba ’ona ba iphapanyetsa ho lefa.

Ba bang ba basebetsi bana ba sa kang ba rata ho hlahisa mabitso a bona, ba neng ba eme libakeng tse haufi le tora ea Banka ea Lesotho le Ha Mafafa, ba llile ka hore ba bang ba bo-ramakoloi ba ba rohaka ka mahlapa a tala ha ba ba bolella hore ba lefelle makoloi a bona.

Ba re ba bile ba ba phaella ka hore ba il’o qosa haeba ba khoboheloa ke ho paka hoa bona libakeng tseo.

“Mosebetsi ona oa rona o boima o re hloisa ka batho hoba re etsa seo ba sa se rateng,” ho rialo e mong oa basebetsi bao.

Taba ena e ile ea tiisoa ke e mong oa ba okametseng basebetsi bao Monghali Teboho Masia.

O hlalosa ha bongata ba beng ba makoloi ba hana hehehe ho lefella thepa eo ea bona, haese ba fokolang ba laba-labelang tsoelo-pele. A re bo-ramakoloi ba khethile ho tlosa makoloi a bona moo ho seiloeng mela e bontšang moo makoloi a lokelang ho ba hona teng. Joale b’a siea moo ho lokelang ho tsamaea litaso, e leng se sitisang sechaba.

“Joale moo teng, re se re siela mapolesa hoba re sebetsa ’moho le ’ona,” ho rialo Masia.

Masia o boela a hlalosa hore ntle le hore makoloi a hana ho lefelloa ke beng ba ’ona, seo ba se etsang ke hore ba fihla hoseng pele ho hora ea borobeli nakong eo libaka li sa lefelloeng. Ebe ba a ntša linomoro, le ho a siea moo letsatsi kaofela. Ha ba hlokomela mantsiboea hore ba ’Masepala ba se ba orohile, ke moo ba eang makoloing a bona ho a palama ho ea hae.

“Joale oa utloa re ka se atlehe ho tseba koloi ha e se na linomoro,” a rialo Masia.

A mang a mapolesa a neng a le tšebetsong ea ho lisa makoloi a pakoang libakeng tse tšoaetsoeng ho tsamaea litaso, a ile a lumellana le taba ea hore ho na le batho ba hanang ho lefella makoloi a bona. Ba supa hore ba hanang ho lefa, ba etsa joalo ha mapolesa a le sieo empa bona mosebetsi oa bona ke ho shebana le makoloi a pakang ka tseleng ea sechaba.

“Rona ehlile ha re batle ho bona koloi e bakang tšetiso moo ho tsamaeang litaso,” ke e mong oa liofisiri tseo tsa sepolesa ea sa kang a rata ho boleloa ka lebitso.

 

  • Share this post:
  • Facebook
  • Twitter
  • Delicious
  • Digg

2 Comments

  • Ba ea hlanya. Ba e pakisa hampe kahara toropo ka mona, ebile ba bang ba tlela feela ho tla paka ebe ba ikela bloemfontein.

  • Ache, ha e le mona ba sa batle ho patala, ha ba se ke ba paka ka har’a teropo hee… ba bone hore ba eo paka ha bona koana.