Menyakoe|June 18, 2013 7:33 am

Sebini se phutha bana ka pina

on_Moruti le bana

 

Ka Kabelo Masoabi

MASERU – Sebini se seng se holileng ’minong oa bolumeli, se tummeng ka lebitso la Moruti, se re se pholosa bana ba phelang seterateng ka pina.

Sena Moruti o se fihlela ka ho hohela bana ka ho bua le bona a ba bontša tsela e nepahetseng ea ho phela, le ka ho bina le eena hohle moo a mengoang le meketjaneng ea hae.

Leha leano lena la hae le sa qala, o supa a se a atlehile ho hohela bashanyana ba bararo ba lilemo li 11, 12 le 15. Bona ba tantšetša katara ea hae ha eena a bina.

O re ho mo qositse libeke tse peli feela hore bana bao ba be ba utloisisa ’mino oa hae; ho tšoara setepe le morethetho oa tantši  ‘moho le ho etsa mekhabo e ikhethileng.

O bontša ha ka matsatsi a tloaelehileng a bina le batho ba baholo ba banna sehlopheng sa hae. O bolela h’a kenyelelitse bana e le tsela ea ho ba phemisa botloko-tsebe.

Ke feela libekeng tse peli tse fetileng ha Moruti ka sehlopha sena sa hae sa bana, a ne a binela matšoele moketjaneng o neng o hlophiloe ke Mokhatlo oa Batšoaruoa ba Mehleng, Maseru.

Mona ke moo litantši li hlileng tsa itšupa mafolo-folo a ho nyakalatsa batho ka tantši e mona e etsoang ke balumeli ba “Makhanyane” (ZCC), ea ho qhoma khafetsa ba tapa-tapa le ho tila-tila fatše ka maoto.

Sebini sena se nang le nalane e telele selika-likoeng sa ’mino oa bolumeli, se re maikutlo a sona a ameha habohloko ha ka linako tsohle a hlokomela bana bana ba iteletseng bophelo ba bokhoba, ba ho phela ka ho qela le ho robala likotopong har’a lirame tsa mariha Motse-Moholo Maseru.

A re qholotso e ’ngoe e tobaneng le naha ea Lesotho ke botloko-tsebe boo bana bana ba holang ba ithuta bona  literateng, ’me qetello ea bona, a re ke ho fella chankaneng haeba ho se motho ea ikutloang ho ba thusa phiri e-s’o je.

“Le tla mpakela sechaba sa heso hore le lona le hlola le ba bona bana bana ka pel’a mabenkele ba tsuba lithethefatsi ka mefuta ena kaofela. Re ba shebeletse ho na le ho ba thusa. Kamoso ba tlil’o hlasela lona e se e le likebekoa tse ke keng tsa hlola li loka,” a hlalosa joalo.

Moruti o re o lumela hore ba teng bana ba nang le litalenta ka ho fapakana ba phelang literateng, ba ka phuthoang le ho betleloa bokamoso bononong ke ba seng ba iphihletse litabeng tseo.

A re: “Ka nako e ’ngoe ke ne ke tšosoe ka lithipa ke ba bang ba baholoanyane ho bana, hona teropong ea Maseru mona. Ba ne ba hlekefetsa ngoanana e mong ea neng a feta ka tsela, ba mo hula eaba ke kena lipakeng ho mo namolela athe ke ipitsetsa mathata. Ke ne ke namoleloe ke bona bana ba bararo bao ke binang le bona joale. Ka theha setsoalle le bona ho tloha mohlang oo.”

Makejakejane ana a tantšetsang Moruti a bolela h’a  bona leseli la bophelo kamor’a ho kopana le eena. A re bophelo ba bona bo fetohile kaha joale ba tseba ho ja, ho nena lithethefatsi le maemo a behang bophelo ba bona tlokotsing esita le ho hlabolloa ke pina.

Bashanyana bana ba boleletse Mosotho hore ba lumela ha ka letsatsi le leng ba tla atleha ho ithehela sehlopha sa bona se tla phela ka pina, pale ea bophelo ba bona literateng le ho hlokomelisa ba bang ka kotsi eo. Boraro ba bona ba behiloe literateng ke mabaka a fapakaneng a bophelo.

  • Share this post:
  • Facebook
  • Twitter
  • Delicious
  • Digg