Litaba, Machabeng|May 20, 2013 2:21 pm

Re tseba tokoloho ea sechaba – Thabane

on_TomThabane

 

Ka Kabelo Masoabi

MASERU – Tona-Kholo Thomas Motsoahae Thabane o re ’muso o tla tšehetsa naha ea Saharawi (Western Sahara) ho lokoloha khatellong ea bokolone ea Morocco kaha Lesotho le na le boiphihlelo litabeng tseo.

Thabane o bile leetong lena ho tloha ka la 7 ho isa la 12 khoeling e holimo e le ka memo ea Moetelli-pele Saharawi Mohamed Abdelaziz. Sepheho sa ketelo se hlalositsoe e le ho tiisa maqhama a renang lipakeng tsa lichaba tsena.

H’a tšehetsa boitlamo ba ’muso litabeng tsena o boletse a le hoteleng ea Maseru Sun Cabanas ka Labohlano ho re Lesotho le lona le kile la e-ba tlas’a khatello ea bokolone e neng e aparetse tikoloho ea Afrika ka kakaretso.

A re ho se iphapanyetsoe ’nete ea hore naha ena e ile ea angoa ka matla ke boitseko ba Afrika Boroa ba ho lokoloha pusong ea bohatelli kaha Basotho ba bangata ba ’nile ba bolaoa ’moho le mehlobo ea naha eo ba leka ho sireletsa bao ka ho ba fa botšabeli Lesotho mona.

Thabane o tsoela-pele ho supa ha litaba tsa lipuso tsa bokolone e le litšomo tsa khale tseo nakong ena ea puso ea temokerasi ho sa lebelloang hore ho ka ba le lichaba tse ntseng li le tlas’a bokhoba bo joalo.

“Lesotho le tla sebetsa ka matla ho hatella tokoloho ea Saharawi hohle likopanong tsa SADC le tsa mekhatlo e meng e meholo ea machaba. Ke boikarabelo ba rona ho thusa lichaba tse ling ho tsoa bokhobeng joalokaha re ’nile ra etsa ka Afrika Boroa linakong tsa ho feta. Re na le boiphihlelo litabeng tsena,” a rialo.

Ho feta moo, Thabane o boetse a bua ka ketelo ea hae le moifo oa matona linaheng tsa Afrika Boroa le Algeria libekeng tsa ho feta.

Maeto ana a ne a kenyeletsa ho tiisa maqhama a renang lipakeng tsa linaha tsena le Lesotho esita le ho ithuta hore lichaba tsa linaha tseo li sebetse joang lintlheng tsa ntšetso-pele ea sechaba haholo temong.

 

 

  • Share this post:
  • Facebook
  • Twitter
  • Delicious
  • Digg