Litaba|March 25, 2013 8:41 am

Moqolotsi oa khakhathoa

on_Talla Motsamai

 

Ka Lerato Buthelezi

MASERU ‑ Moqolotsi oa Seea-le-moea  sa Harvest  FM, Motsamai Talla o chele ntši ho ritela nyeoe khahlanong le bafutuheli ba hae nakong eo a neng a tsoa mosebetsing Afrika Boroa.

Ha re ne re ea khatisong seboholi sena sa lenaneo la Ntatise Moqhobi seea-le-moeeng seo, se ne se tsamaea ka ho ikokotlela ka molangoana kaha se ile sa lemala ha se ne se tšola tlhako morong ha se futuheloa.

H’a tla kopana le tlhaselo eo, o ne a tsoa lelibohong la Maseru moo a neng a sa tsoa buisana le bo-ramakoloi a baeti ba Afrika Boroa ka baeti ba palamisoang ke makoloi a beng ba ’ona ba eang Ladybrand, hona naheng eo.

Sehlopha se sebetsang ka sekhukhu sa bashanyana se kopela baeti ba eang sebakeng seo ho palamisa batho bana ba litaaso ba lokelang ho palama  makoloi a baeti.

Talla o re ho latela lenaneo leo a le etsang seea-le-moeeng sa Harvest FM le buang ka litaba tsa khoebo ea makoloi, o ile a fumana tletlebo e tsoang ho beng ba makoloi a baeti ba mokhatlo oa makoloi a baeti oa Manyatseng.

A re litho tsa mokhatlo li ne li ile tsa mo loma tsebe hore ho na le batho ba thaothelang baeti makoloi a beng ba ’ona, ho ba qobisa ho palama a molao a baeti.

Ho ea ka eena, ho bonahetse balli bao ba Manyatseng ba bile ba tlalehela sepolesa sa Lesotho ho ba thusa qakeng eo. Empa ba hamela letanteng.

Lequloana lena la bashanyana le tšelela ka Afrika Boroa ho ea thaothela beng ba makoloi baeti ba lokelang ho palama makoloi a baeti.

“Ke ile ka roala lieta moo teng ke neng ke il’o bua le beng ba makoloi a Manyetseng ka tsona litaba tsena. Teng ba ile ba hlalosa hore khoebo ea bona e bonahala e se e le makhatheng a ho putlama ke lirurubele (batho bana ba kopelang  baeti ho palamisoa) kaha joale baeti ba bangata ha ba sa ea makoloing a baeti,” a rialo.

O itse tlhaloso ke hore baeti ba se ba tšabela makoloing ao a beng ba ’ona. Empa ha makoloi ao a hlaheloa ke mathata, menoana e supa haele bona ba molato ka ho se tsotelle baeti.

“Ka linako tse ling litopo li qetelle li lahlehile ka lebaka lona lena la ho kopeloa ho tsamaisoa bashanyaneng,” a rialo Talla.

Kamor’a ho tšohla litaba tseo le litho tsa mokhatlo oo, o ile a ea sepoleseng, moo hamorao a ileng a khutlela hae.

Hang h’a qeta ho kena ka koloing ea lephele (4+1), ke moo bao ba bitsoang lirurubele ba ileng ba tsoa ka har’a mekhukhu ho mo futuhela ka melamu.

Bona ba ile ba emisa koloi eo a e palameng, ba mo ntša ka har’a eona, ho mo setla ka melamu. Ba ne ba bile ba hlometse ka lithipa. Ba mo qosa ka hore na o batla ho ba senyetsa mosebetsi ho latela tseo a li buileng le bao ba mokhatlo.

“Kaha ke ne ke tseba hore ke etsa mosebetsi o nepahetseng le Molimo o ile a nthusa eaba kea baleha ke mathela mapoleseng,” o boletse joalo.  “Ha ke fihla mapoleseng a ka borokhong, a ile a mpha lengolo leo ka lona ba neng ba re ke eo bona ngaka.”

Ho otloa hoo ho entse hore a be le metopa e bohloko, a be a nonyetsehe leotong h’a khola phalo. Ke moo a seng a lokela ho ikokotlela ka molangoana kaha a ruruhile leoto.

Hamorao, sepolesa se ile sa tšoara babelaelloa ba fetang 10 bao boholo e leng ba Ha Hoohlo ba lilemo li pakeng tsa 25 le 30.

“Ke ile ka kopa sepolesa hore se ba khalemele, ha ke batle ho ba qosa. Ke batla feela hore ba khalemeloe,” ho tiisitse Talla eo e leng molumeli oa Kereke ea Pholosoa.

A qetella ka hore Basotho ba itlhokomele haholo-holo nakong ena ea Paseka ka ha bashanyana bana ba tla nka monyetla oa ho ba kenya likhathatsong  nakong ena ea Paseka. A khothaletsa Basotho ho sebelisa makoloi a baeti ha ba nka maeto ho ea Manyatseng, ba lese ho hoheloa ke bashanyana bao.

Liteko tsa ho fumana lehlakore la sebui sa sepolesa sa Lesotho li ile tsa boholoa ke lintja. Athe moemeli oa Manyatseng Taxi Association o itse o lokela ho bua le beng ba mokhatlo pele a bua le maqolotsi.

  • Share this post:
  • Facebook
  • Twitter
  • Delicious
  • Digg

2 Comments

  • AO shame,,,,,,,,,,,,,poor him

  • Eish but Lerato did a wondederful job by making this known,otherwise journos will be in danger ,,,,may the minister bring a media policy out SOOOON,maybe it will cub all this