Litaba|January 21, 2013 9:31 am

Motlotlehi o re ‘o koalletsoe’

Mofu malefetsane nkhahle o lebisoa linqalong tsa bafu

Mofu Malefetsane Nkhahle o lebisoa linqalong tsa bafu

 

Ka Kabelo Masoabi

MASERU – Motlotlehi Letsie III o re o koalletsoe.

Seo o se buile phupung ea setho sa Komisi e Ikemetseng ea Likhetho (IEC) Malefetsane Nkhahle Kerekeng ea Sefika, Maseru ka Moqebelo.

“Ba bangata ho lona mona ha ba tsebe hore ke ile ka sebetsa ke le mohlanka oa ’muso lekhotleng leo (MCC) pele ke koalloa tjena,” ke Motlotlehi eo a bolella sechaba se neng se khobokane ka kerekeng ea Sefika.

Motlotlehi a sa tebe haholo ka ho koalloa hoa hae, o ile a re o utloisisa tahlehelo e teng ka har’a Basotho ka lebaka la ho feta hoa Nkhahle. A re o rialo hobane a tseba sebopeho sa mofu hantle kaha a kile a sebetsa tlas’a bolaoli ba eena mofu lekhotleng leo la teropo ea Maseru lilemong tse ngata tse fetileng.

“Ke ne ke etse kopo ea mosebetsi lekhotleng leo. Ka bitsetsoa lipotsong, ka atleha ho fumana mosebetsi moo ke okametsoe ke eena mofu,” a rialo Motlotlehi.

Motlotlehi o boetse a tšelisa lelapa la mofu, haholo mofumahali oa hae ka mantsoe a reng a tiee ’moko, a tšepele ho Jesu hore a tle a mo tataise tseleng e bolutu ea bophelo, eo a seng a tla e tsamaea a hloka molekane.

“Ka lehlohonolo le eena mofumahali oa mofu kea mo tseba, ’me ke feela ke sa phopholetse ha ke bua ka lelapa lena la Nkhahle.” Motlotlehi o tsoela-pele: “Ke lumela hore uena Paballo, u ne u tšehetsa enoa molekane oa hau h’a tsoa ngoapuoa ke bo-ralipolotiki, o mo phumule meokho le mehoabali ea bona kamehla. Rea leboha ke hona ka tšehetso eo.”

Nkhahle o timetse ka la 6 Pherekhong kamor’a ho tsietsoa ke bothata ba ho hema a le lilemo li 61.

Phupung ena ho ne ho bile ho le teng Morena oa Sehlooho oa Matsieng Morena Seeiso Bereng Seeiso, matona le tona-kholo ea mehleng Dr Pakalitha Mosisili.

Libui tse ngata tsa letsatsi li hlalositse mofu e ne e le motho oa bohlokoa har’a sechaba sa Basotho kaha a se sebelelitse ka nako e telele a na le boitelo le botšepehi.

Lebitsong la ’muso, matšeliso a fetisitsoe ke Letona la Meru, Khotso Matla, ea buileng bosieong ba Tona-Kholo Motsoahae Thabane. O ile a hlalosetsa sechaba hore Thabane  o ne phathahane mosebetsing oa khurumollo ea lejoe la e mong oa lelapa.

Matla a re Nkhahle e bile monna ea nang le pelo le mamello kaha o atlehile ho tlisetsa naha likhetho tsa khotso ngoahola.

“Mosebetsi oa hae e ne e le o boima ka tsela e khethehileng hobane o ne a okametse komisi  e neng e se e nyenyefatsoa ke bo-ralipolotiki bana ba naha ena.

“O atlehile ho khutlisa tšepo likhethong tse akaretsang tsa ngoahola kaha e bile tsa khotso, tse hlokang likhang,” ke Matla eo.

O itse o tsebile mofu ka 1964 ba le Hlotse moo ’m’e oa mofu a neng a sebetsa e le mooki sepetlele, ha eena Matla a ne a amohetsoe moo e le mokuli. A qetella ka hore Nkhahle e ne e le motho ea makhethe haholo le bana babo, ’me o timela tjena a ntse a le bohloeki bo hlollang.

Morena Seeiso le eena o ile a fetisa matšeliso a hae ka ho thatiselletsa hore mofu o atlehisitse likhetho tsa khotso. A hlokomelisa sechaba hore puso ea sechaba ka sechaba e qala ka lapeng.

“Ho tšoana le bokreste bo qalang ka lapeng. Puso ea sechaba ka sechaba e lokeloa ho baballoa joalokaha e-ka ke lesea hoba ha le ke le lahloe feela,” a rialo.

A re o ’nile a tseba mofu ha ba kopana mesebetsing e meng ea sechaba joaloka nakong eo ba neng ba le Engelane.

Mofu o boetse a sebetsa mokhatlong oa bophatlalatsi oa Media Institute of Southern Africa (MISA) Lesotho moo e bileng mookameli ka lilemo tse ’maloa. O boetse ea e-ba mongoli e moholo Lekaleng la Bosebeletsi ba Sechaba, a sebetsa lekhotleng la matona le ho ba tlelereke ka ntlong ea Senate.

Mofu o siea mosali le bana ba bararo – bara ba babeli le morali.

 

 

  • Share this post:
  • Facebook
  • Twitter
  • Delicious
  • Digg

1 Comment

  • Motloltehi ebe o bolelang ha are o koaletsoe? ke utloa eka ona le taba mona eo e hlokang ho hlapolloa hoba ke nka a re sietse selotho se hlokang karabo.