Litaba|January 21, 2013 9:25 am

Phano ea mali e’a ntlafala

on_blood transfusion

 

Ka Motsamai Mokotjo

MASERU – Litšebeletso tsa phano ea mali li se li  tla ntlafala kaha lefapha leo le se le tla sebeletsa moahong o majaba-jaba o jeleng M10 millione.

Moaho ona o sebakeng sa Botšabelo, Maseru, o fanoe ke Morero oa Amerika oa Mongoaha-kholo le letlole la teng ka la 18 Pherekhong, monongoaha.

Moaho o na le liphaposi tse akhang polokelong ea mali, sebaka sa liteko tsa lihlopha tsa mali, ofisi ea botsamaisi, lihatsetsing le tse ling.

Moaho o tla etsa hore litšebeletso e be tse akofileng le ho tsoa matsoho ka lebaka la thepa e fumanoang moo.

H’a lahla malepe puisanong le Mosotho, mookameli oa lefapha leo Mofumahali ’Malepoqo Nyopa o itse o motlotlo ke ho bona hore ba tla phahamela mapoqo ho fana ka litšebeletso tse makhethe.

Lefapha le ne le sebeletsa moahong oa Tradorette, moo ho neng ho le mopetetsane. Ka hona, ho sitisa ho fana ka tšebetso e babatsehang.

Ka thabo Mofumahali Nyopa o itse: “Ke tlotla ho rona hobane haesale re sokola  mesebetsing eohle e re amang empa joale kaha re abetsoe moaho ona o moholo, ke nahana hore tšebetso ea rona e tla matlafala.”

Tšitiso e kholo, ho ea ka eena, e ne e le hore ha ho bobebe ho sechaba ho tseba moo litšebeletso tsa mali li neng li fanoa hona teng, “empa joale ho se ho tla ba bonolo ho tseba.”

Lebitsong la morero oo oa Amerika, eo e leng mohokahanyi litabeng tsa bophelo, Monghali Kananelo Malahleha, o tšepa hore sechaba se tla khola molemo ho setsi sena se secha.

E meng ea merero, ho latela Malahleha, ke ho thetha  khaho ea liphaposi tsa barutuoa Sekolong sa Koetliso ea Baoki (NHTC) le lipetlele.

Lenyalo lena le pakeng tsa Lesotho le naha ea Amerika ntšetso-peleng ea mafapha a fapakaneng, o fihla qholong ea oona ka Loetse monongoaha.

Seqapi sa meaho ea ’muso Monghali Mokete Mokete o hlahisitse taba-tabelo ea ’muso ea ho bona hore sechaba se fumantšoa molemo ke setsi sena.

“Re leboha Molimo le sehlopha sena sa Amerika  se entseng mosebetsi ona o tsoileng matsoho molemong oa sechaba sa Basotho. Re thabile haholo ho abeloa moaho ona. Tšepo ke hore re tla o sebelisa hantle,” ke Mokete eo.

Pulo ena ea moaho e tla nakong eo ho nang le leqeme la phano ea mali le ngongorehisang lefapha lena la mali.

Ho ea ka tlaleho ea Tšitoe ngoahola, lefapha le hloka mali a etsang liphutheloana tse 600 tsa boholo ba lebokose la lebese la ‘Long Life’. Hajoale le na le pokello ea tse 400.

Ka bokheleke, Mofumahali Nyopa o re: “Tlhokahalo ea mali ha e na ho fetoloa ke moaho ona o mocha. Ke sechaba se tlamehang ho fetola litloaelo tsa sona (tsa ho se fane ka mali). Kaha re na le sebaka sa tšebetso le lisebelisuoa, re tšepa hore re tla fumana batho ba bangata ho fana ka mali.”

Lefapha le rerile ho ea ka makhalo ho thokola sechaba libakeng tse fapaneng ho fana ka mali e le ho pholosa maphelo a batho ba tsietsing ea ho thusoa ka mali.

Lefapha lena le tlas’a Lekala la Bophelo, le qalile mosebetsi oa lona ka 1984 le bokella le ho fana ka mali.

Ho ka sehlohlolong hajoale ka tšebetso ena ke ho loantša ho ata hoa kokoana-hloko e bakang Aids, pheliso ea lefuba (TB), khaho ea litsi tsa bophelo le ho nchafatsa tse seng li tsofetse.

Lenane lena le tšehelitsoe ka lichelete ke ba Letlole la Liqholotso tsa Mongoaha-Kholo (MCA).

  • Share this post:
  • Facebook
  • Twitter
  • Delicious
  • Digg

4 Comments

  • Ho fana ka mali ho thusa hoo! Pele ea pele!!

  • Hona hona hee ke se hlokoang ke Basotho ka thata. Ha se khale ha ho phatlaltsoa ka moo mali a haellang ka teng ke ba Blood Bank. Litlaleho li ne li supa ha ho bonahala ho na le khaello ea mali bakeng sa ho thusa bakoli lipetlele hoo beng ka bona ba neng ba bile ba se ba ikisa ka ho tlameha ho fana ka mali, e leng se sa khothaletsoeng ke litsibi ka ha ho thoe motho a ithaope, e seng a tlamehe kapa hona ho qobelloa. Re lumela ka sena se entsoeng ke ba Morero oa Amerika oa Mongoaha-kholo ruri Basotho ba tla imona-menoana ka sona.