Litaba|December 4, 2012 3:07 pm

Koloi e rinya bana ba bahlano

Ka Kabelo Masoabi

MASERU – Bana ba bahlano ba hlokahetse kamor’a ho pheseloa ke koloi ba e-tsoa sekolong sebakeng sa Ha Khitione tikolohong ea Ha Mofoka, Koro-Koro.

Sepolesa se re koloi ea ’motokara, e neng e fokaela ho matha ka lebelo le phahameng, e ile ea thula bana ba lilemo tsa ho tloha ho tse robong ho isa ho tse 13, eaba ea ba timetsa bohlano ba bona.

Ketsahalong e ’ngoe moqhobi oa koloi o ile a hlokahala nakong eo koloi ea hae e neng e thulana sa lipheleu le e ’ngoe haufi le Bochabela 3, Khubetsoana bekeng e fetileng. E ne e ka ba ka hora ea bohlano mesong ha likoloi tsena li momana e ’ngoe e ba e hlaba hlohlolingoane ka thoko ho tsela. Mofu ke monna ea lilemo li 24 oa Leribe.

Sesosa sa kotsi, Ntlo-Kholo ea sepolesa e hlalositse e le ho se natse matšoao le melao ea tsela kaha ho hlahella ha moqhobi e mong a sa ka a khina koloi pele a kenella ’mila o moholo o tlohang khubung ea motse-moholo Maseru ho leba Leribe.

“E mong moqhobi o ikenetse feela ka tseleng, ’me a khahlana le koloi e ’ngoe eaba li se li nkana hona moo, moqhobi a ba a felloa ke bophelo,” ke Senior Inspector Masupha Masupha eo a hlalosa tsa ketsahalo.

Ho sa le joalo, Mangopeng, Roma koloi e ile ea thula monna oa taaso ea lilemo li 30 oa hona sebakeng seo a ba a timela hang.

Ke litlaleho tse 94 tsa likotsi tsa mebileng tse fihlileng mapoleseng, ’me tse fetileng ka maphelo a batho ba litaaso ke tse supileng bekeng e fetileng. Ke likoloi tse 131 tse senyehileng ha batho ba 21 ba lemetse likotsing tsena.

Masupha o hlokomelisitse baqhobi ho ela hloko phallo ea sephethe-phethe e tlang ho ba teng nakong ena ea mafelo a selemo. A bontša hore batho ba bangata ba tla leba literopong, haholo ea Maseru ho ea rekela bana liphahlo tsa keresemese.

“Mafelong a beke e fetileng, re bone ha sephethe-phethe sa makoloi se okamela teropo ea Maseru, ’me baqhobi ba nyahlatsa makoloi a bona ka ’mileng ka lebaka la ho tsamaea ka thata, ba potlakela ho leba mabenkeleng. Re ba hlokomelisa ho ikobela matšoao a tsela ho qoba ho sitisa phallo e ntle ea sephethe-phethe le ho qoba ho baka likotsi. Mapolesa a tla bonahala ka bongata ho laola boemo bona,” a rialo Masupha.

  • Share this post:
  • Facebook
  • Twitter
  • Delicious
  • Digg

3 Comments