Litaba, Machabeng|November 9, 2012 12:55 pm

Masolomane a Afrika a koteloa thapelong

Naha ea Saudi Arabia e thibetse linaha tsa Congo ea Republic le Uganda, tseo ka bobeli li fumanehang tikolohong ea Afrika, ho romella balumeli ba tsona ba masolomane sebakeng sa khalalelo se bitsoang ka lebitso la Mecca.

Mokete oa thapelo oa Mecca o tšoaroa selemo le selemo ke masolomane lefatše lohle.

Thibelo ena e entsoeng ke Saudi Arabia selemong sena e hlalosoa ka hore e etsoa ka sepheo sa ho thibela lefu la letšollo le la ebola a aparatseng tikoloho eo linaha tsena li fumanehang ho eona.

E mong oa baetapele ba tumelo ea masolomane oa naha ea Congo, moruti Abdallah Mangala, o re ka lebaka lena balumeli ba masolomane ba Congo le Uganda tla lofa ketsahalo ena ea bohlokoa ea thapelo selemong sena.

O itse o nahana hore sena Saudi Arabia e se entse ho qoba tšoaetsano ea mofuta ofe kapa ofe e kabang teng kaha mafu a letšollo le ebola a jele setsi haholo linaheng tsena tse peli tsa Afrika.

Matšoele-tšoele a balumeli ba masolomane a qalile ho fihlellana Mecca, ho etsa pokano e nkoang e le e kholohali lefatšeng, mme e tlang ho qala ka la 25 khoeling e holimo. Hangata ho e ho lebelloe sechaba sa balumeli se ka etsang milone.

Congo e tšoengoa haholo ke letšollo le batho ba lulang ba lla ka bohloko ba mala, mme ebile sechaba sa teng se hlaseloa habohloko ke lefu la ebola, e leng le leng la mafu a kotsi haholo lefatšeng morao tjena.

Ho ea ka mokhatlo oa lefatše oa bophelo (World Health Organisation), o esong ho kenye tšebetsomg likotlo qobello tsa mofuta ofe kapa ofe khahlanong le schaba sa linaha tsena tse peli, ekaba batho ba fetang 20 000 ba tšoeroeng ke letšollo naheng ea Congo selemong sena.

  • Share this post:
  • Facebook
  • Twitter
  • Delicious
  • Digg