Litaba|November 30, 2018 9:55 am

Thabane o qhautsa Metsing

MASERU (TmgLive) – Tona-kholo Motsoahae Thabane o qhaulitse moetapele oa nonyana e kholo (Lesotho Congress for Democracy – LCD) ea soa tsoa khotla palehong Africa Boroa.

Tona-kholo Thabane o qhautsa monghali Metsing tje kamor’a hore ba re tjoang-tjoang holong ea liboka ea ‘Manthabiseng moo baetapele ba bangata ba sechaba ba Lesotho ba neng ba khobokane teng ho ea tsohla maano ao ba ka tlang ka ona ho netefatsa hore Lesotho eba naha ea toka, botsitso, khotso le tsoelopele.

Ke hona mona moo tona-kholo Thabane a ileng a faumana monyetla oa hore a itsoarele monghali Metsing ka letsoho ka seqo.

Empa monghali Metsing le eena, joalokaha eka o ne a lapetse monyetla oa ho etsa khahlane-ea-khahla-batho-ra-khahlana le tona-kholo Thabane, o ile a mo laimela seka katse e emetse toeba.

Baetapele bana ka bobeli ba ile ba tsoarana ka matsosho ho lumelisana ‘me ba eja lebonyo, ha ‘Tau ea thaba’, tona-kholo ea mehleng, monghali Pakalitha Mosisili, a ne a shebeletse a le thokoana ‘me a bobotheha joaloka ngoana lesea.

Baetapele ba Lesotho, tlasa bolisa ba mokhatlo oa linaha tsa tikoloho e ka boroa ho Africa (SADC) ba entse lipuo tse neng li utloahala li tletse boikoahlaho, tsoabo le ho baka.

“Ka moea o motle libapali”, ke Tonakholo Thabane eo ha a leboha kamoo ba buisaneng litaba tsa naha ka teng.

Haele motlatsi oa tonakholo eena, monghali Monyane Moleleki, o itse boholo ba batho “ba ile ba tsoaloa, ba nyaloa, ba nyala, ba eba le bana, ba eba le litloholo le litloholoana, ba ba ba eshoa ba eso fumane monyetla o kang ona. Ake le boneng hore na re lehlohonolo ha ka kang ka ho funama monyetla ona. Kahoo, itlhokomeleng he bana ba Kriste.”

Moetepale oa bohanyetsi, ‘e mosehla oa Qhoali’ o ile a li beha tjena: “Re fumane monyetla ‘me re lokela ho aha Lesotho leo re le batlang. E seng leo o le batlang kapa le batloang ke mokha kapa lekhotla… kapa mokhatlo oa hao, empa leo re le hlokang re le Basotho.”

  • Share this post:
  • Facebook
  • Twitter
  • Delicious
  • Digg