Khoebo|October 22, 2018 5:43 am

BEP e khetha bacha ba 40

Ka Lerato Buthelezi

MASERU – Morero oa ho phahamisa morolo ka har’a bacha ho ithehela mesebetsi, le ho kenya letsoho le toma kholisong ea moruo oa naha, Bacha Enterprise Project, o khethile bacha ba 40, ba tsebileng ho hlalosa ka bokheleke hore na ba batla likhoebo tsa bona ebe tsa mofuta o feng.

Bacha bana ba 40 ba khethiloe ka hare ho bacha ba 255 ba neng ba entse likopo tsa ho thusoa ka kholiso ea likheobo tsa bona. Karolo ena ea BEP kea bobeli selemong sena sa 2018.

Ho ea ka thlaloso ho tsoa Setsing sa Pokello ea Lekhetho e supile hore bacha ba 40 ba tla ea koetlisong ea litaba tse amanang le khoebo libeke tse peli ho qala ka la 22 Mphalane setsing sa BEDCO.

Boikoetliso bona bo tla thusa bacha bana ka mekhoa e mengata ea ho holisa likhoebo, e kenyeletsang poloko ea lichelete le ho ipapatsa hore batho ba tsebe likhoebo tsa bona.

Khoheletso ena e ile ea etsoa ka Phupu monongoaha moo ho neng ho kopiloe bacha ba lilemo li lipakeng tsa 21 ho isa 35 ho etsa likopo, e ntse e le hona ho fokotsa bofuma ka hare ho naha. Bacha bana likopo tsa bona li ile tsa hlahlojoa ke mafapha a ‘maloa a amehelang ho kenyeletsa LRA, Lesotho Standard Bank, Lekala la Bacha le Lipapali le Likh’amphani tse ikemetseng.

Bahlahlobi ba tla khetha ba tlang ho ipabola ba 10 ba tla ea lipotsong ho fihlela ho fumanoe ba bane ba tlang ho arola chelete e kaalo ka M700,000.

Bacha Enterprise Project, ke letlole le kopanetsoeng ke LRA, BEDCO le Standard Lesotho Bank, leo sepheo sa lona e leng ho fokotsa tlhokahalo ea mesebetsi haholo ho bacha, ‘me tebello e kholo ke ho holisa bacha khoebong hore ebe bo-rakhoebo ba baholo e le ho nyolla moruo oa naha le ho fana ka mesebetsi ho batho ba bang.

  • Share this post:
  • Facebook
  • Twitter
  • Delicious
  • Digg