Litaba|October 22, 2018 5:37 am

Baqhobi ba ntšoa linta ka sheshe

KABELO MASOABI

MAPUTSOE – Ngoahola mohlankana oa seemo, Silo Mantsoe, oa Ha Ben, h’a ka thabela ho tolisoa letamong ka khang ke basebetsi ‘moho khoebong ea makoloi a baeti, empa kajeno o motlotlo ke seo.

O bua tjena haufinyane a ipapisitse le ho tolisoa hoa ba bang ba baqhobi ba makoloi a manyane, a 4+1 kapa maphele, joalokaha a tloaetsoe ho bitsoa.

“Ke ne ke koatile hampe mohla ke tolisoang ke banna ba hlalosa ha kamehla ke sebeletsa baeti ke sa hloeka leha ‘na ke ne ke sa elelloe bohlokoa ba ho hlapa pele ke leba mosebetsing. Bao ba boela ba nthekela liaparo tseo ke neng ke sa tsotelle ho ipatlela tsona, ‘me ho tloha letsatsing leo ka hloeka, ka phehella ho lula ke bolokile bohloeki,” ho hlalosa Mantsoe eo e leng mothusi oa moqhobi tekesing.

Kajeno o utloisisa hantle hore baeti le moqhobi ha ba ne ba lla ka lehafi la hae le lieta ho nkha, ba ne ba sa mo hobose empa ba mo hlokomelisa boemo bo bosula boo a ba kenyang ka har’a bona.

Ka Labobeli baqhobi ba babeli ba tolumelitsoe letamong Ha Nyenye ke baqhobi ba bang ba maphele ka sello se tšoanang, ba ba ba rekeloa liaparo tse reretsoeng ho ba thusa ho phetla leqephe le lecha bophelong ba bona. Baeti ba tlalehoa ba se ba ba nyatsa.

E mong oa baqhobi Limapo Polaki o itse ha ho monate ho bona ho sebeletsa sechaba le batho ba sa itlhokomeleng hobane seo se susumetsa baeti ho ba akareletsa kaofela ka bohlasoa. A re ba hlola ba utloa baeti ha ba lla ba re ba eletse ba joalo ho hlapa hobane ba se ba khesa ho palama makoloi a qhojoang ke bona.

Ha baeti ba se ba nyatsa koloi ea hau ka mabaka a sieo joalo hoo ho bolela hore o tla fihla ho mon’g’ahau o sena chelete ‘me a o tebele. Re lakaletsa bohle ho sebetsa hantle le ho atleha khoebong ena ekaba mohiruoa kapa mohiri re bile re ntse re hlompha baeti ba re fang papa,” a rialo.

E se e batla e fetoha tloaelo hore baqhobi le bathusi ba bona ba bonahalang ba tšaba metsi, ba hlapisoe matamong ka khang ba be ba rekeloe liaparo ka boikopanyo tikolohong ea Maputsoe.

  • Share this post:
  • Facebook
  • Twitter
  • Delicious
  • Digg