Litaba|October 22, 2018 5:30 am

Motlohi ore ba loanetse ABC

Ka Lerato Buthelezi

BUTHA-BUTHE – Mokhethoa oa Lebatooa la Butha Buthe #5, Monghali Motlohi Maliehe ore sepheo sa bona sa ho theha ABC, ke hobane bane ba tseka litšebeletso tse neng li le sieo nakong ea puso eo baneng ba le ho eona, ea LCD, ‘me ba ithera ba theha ABC.

Tsena Motlohi o ile a li bua nakong eo a neng a lakaletsa ABC hore e hole kaha e qeta lilemo tse 12 monongoaha.

“Ha re theha mokha ona ke hobane re ne re batla bahetene le bakreste ba kopane e be ntho e le ‘ngoe, mokha ona hase o khethang batho, ‘ me ke sona sepheeo se seholo seo re ileng ra theha mokha ona ka sona,” a rialo Motlohi.

Motlohi nakong eo a fihlang sebokeng kamor’a hore batho ba bangata ba fihle, o ile a bonahala a fihla a hatela holimo a thabile a lumelisa bohle ka thabo e kholo, se ileng sa makatsa ke ho hlokomela hore bakhethoa ba bang ba ile ba bonahala ba tsitsipana nakong eo a ba lumelisang ba sa batle hore a ba lumelise.

Ha ele Monghali Nyapane Kaya eena o ile a bonahala a sa ikamahanye le liphetoho a ituletse letsoeleng a sa kena moo bakhethoa ba bang ba leng hona teng.

Litaba tsena li tlile kamor’a hore ho bonahale ho se utloane ha bakhethoa bana ba babeli le Tona Kholo, hoo a bileng a ba tsekisa botona. Batho ba bangata bane ba hloma ka hore bobeli bona e tlaba bo se bo tšeletse mekheng e meng.

H’a bua Mookameli oa Lebatooa Monghali Teboho Qhoqha o ile a kopa hore Ma ABC a tlohelle ho bua litaba tsa bona mapatlelong a liea-le-moea le likoranteng ba tseba hantle hore na haeba ba ena le litaba ba lokela hore ba li bue ho kae, e seng sena seo ba se etsang.

“Qholotso eo e ntseng e re tobile ke thlokahalo ea mesebetsi ho bohle, ke kopa ‘Muso o thuse bahoebi hore ba tle ba tsebe ho hira Basotho ba bangata. Batho ba bangata ba bonahalang ba ntse ba etsa lerata ka litaba tsa ABC ebile e le bakhethoa bona ba tla kopana le sechaba nakong ea likhetho,” a rialo Qhoqha.

  • Share this post:
  • Facebook
  • Twitter
  • Delicious
  • Digg