Litaba|October 22, 2018 5:28 am

Mora o beta ’m’ae

KABELO MASOABI

BEREA – Monna ea lilemo li 20 oa Ha ’Mamathe o khethile lefu holim’a bophelo kamor’a ho qhautsoa le ho tsiptjoa ke sechaba, a qosoa ka ho beta ‘m’ae ka makhetlo.

Ho hlalosoa ha mofu a ile a latola ho itlaleha moreneng ka makhetlo, a ntse a bitsoa ho ea khalengoa. O qetelletse a qhautsoa ke sechaba se halefisitsoeng ke ho utloa sello sa motsoali ea reng mora o’a mo robala.

Sona se ile sa mo khannela sepoleseng empa a fella tseleng moo likate tse lebisitseng ho shoeng hoa hae li sa hlakeng.

“O ne a tabanya hlooho fatše nakong eo a ntseng a qhojoa, a hlalosa ha eena a ka mpa a shoa ho e-na le ho ea teronkong. Re lumela maqeba a hlahileng hloohong h’a ntsa etsa joalo e le ona a memmeng lefu la hae hobane sechaba se hlile sa eletsoa ka thata ho se mo khobatse kaha se ka kena tlolong ea molao,” ho hlalosa Mok’hanselara ea sa ratang ho boleloa ka lebitso.

Mofu ho tlalehoa a ne a teteka, a rohaka ‘m’ae le mang kapa mang ea lekang ho khalema ho kenyeletsa le morena, a re habo moo ke ha hae, ke eena a busang.

Setopo se ile sa isoa ‘moshareng o haufi ha sepolesa se ntse se tsoelapele ka lipatlisiso.

  • Share this post:
  • Facebook
  • Twitter
  • Delicious
  • Digg