Khoebo, Litaba|September 8, 2018 7:36 pm

Morafo oa Mothae o qala ho rafa

KABELO MASOABI:

MOKHOTLONG – Sechaba sa libaka tsa Mokhotlong se re se thabetse le ho amohela ka liatla tse peli ho kena tšebetsong hoa morafo oa Mothae kamor’a hore o romelle thekisong, mose ho maoatle, litaemane tsa pele tse rafiloeng sebakeng seo sa bona.

’Maene oa Mothae ke oa bone o tla hlahisa litaemane tsa boemo bo holimo ka har’a naha, ’me o thakhotse thekiso ea eona bekeng e fetileng.

“Ruri joale Molimo o shebile setereke sena ka leihlo le mohau hobane ke mona o utullotse leruo leo rona re neng re sa bone hore le lengata hakana mona. Re tla tseba ho tsoa bofumeng ha feela eba barafi ba tla re hlomphela tokelo ea ho rekisa sehloliloeng sena sa rona molemong oa rona,” eo ke Mofumahali ’Malekata Bolani oa Mapholaneng.

’Maene o fumanehang haufi le oa Letšeng – o tummeng ka ho hlahisa litaemane tsa lijoabelahali, tsa boleng bo holimo – o rometse litaemane naheng ea Belgium moo li tla rekisoa tlas’a tsamaiso ea K’hamphane ea Australia ea LUCAPA Diamond, e tsamaisang ’maene oa Mothae.

“Lesotho ke naha e hlomphehang machabeng ka tlhahiso ea taemane ea boleng bo holimo, ’me rona ba LUCAPA, re thabetse ho ba karolo ea ’maene oa Mothae, o tla kenya letsoho kholisong ea moruo oa naha molemong oa Basotho,” ho rialo Mookameli-Kakaretso oa LUCAPA Monghali Stephen Wetherall nakong ea ho thakholoa hoa thekiso

Athe Letona le Merafo, Mohlomphehi Keketso Sello, eena o hlalositse h’a ikholisitse hore ponaletso e teng nakong eo ho hlopheloang ho rekisoa hoa taemane kaha a iponetse ka mahlo a hae, methati eohle e lateloang.

Ha ho phethetsoe tšebetso mochining o tla sebetsana le litaemane ka Pherekhong 2019, ke batho ba 250 ba tla lebelloa ho fuoa mosebetsi ke ’maene ho ea ka tlhaloso ea morafo.

K’hamphane ea LUCUPA e fupere liabo tse etsang linoko tse 70 (70%) ha ’muso o tšoere tse 30 (30%) ’me ke chelete e balloang ho limilone tse 20 tsa Litolara tsa  Amerika tseo LUCAPA e seng e li tsetetse ho kenya tšebetsong ’maeneng oa Mothae.

  • Share this post:
  • Facebook
  • Twitter
  • Delicious
  • Digg