Khoebo, Litaba|March 5, 2014 1:18 pm

Feme ea PLM e’a koaloa

Feme ea Philip

Ka Napo Lekhooana

MASERU – Feme e hlahisang mabone ea Philips Lighting Maseru (PLM) e phatlalalitse ho koala hoa eona sebakeng sa Ha Tikoe ka Labone la beke e fetileng.
Mookameli oa feme Monghali Dariusz Cimochowski o hlalositse hore qeto ea ho koaloa hoa tšebetso e tsoaloa ke sekhahla sa mofuta oa morao-rao oa mabone a ka matlung ao ba sitoang ho a etsa. A supa hape hore e boetse e bakoa ke tsoelo-pele e teng ea ho hahamalla mokhoeng oa morao-rao oa tšebeliso ea tsa mahlale oo ba se nang oona.
Har’a mabaka a mang ke taba ea ho susumeletsoa ke maemo a khoebo e sa tsamaeeng hantle. A re ha se hakaalo ho se bontše boiphihlelo ba basebetsi ba feme.
“Nakong eo Philips e ntseng e tsitlalletse ho matlafatsa boteng ba eona tikolohong ena ea Afrika, feme ea rona e Lesotho e bonahetse e hoehla ka boima, ’me ho se molemo oo e o unang kapa hona hore re bone tema. Batho ba thabela lintho tse ncha tse laolehang tse ka sebetsang ka mokhoa o bobebe papisong le mabone ana a khale, ao re ileng ra a tloaela,” ho rialo Cimochowisk.
Feme ea PLM e thehiloe ka 2009, ’me e fihlile kahare ho naha e hlahisa mofuta oa mabone a pele a bonahetseng a sebelisoa haholo linaheng tsa Afrika e boroa.
Tlhaloso e supa ha sepheo sa feme e ne e le ho hlahisa mabone e le ho khahlametsa mebuso ea Afrika e boroa tšebelisong ea motlakase.
Morero e ne e le ho hlahisa mesebetsi e 500, e tla thusa ’Muso oa Lesotho kholong ea moruo oa eona.
Philips e ne e ile ea thakhola mosebetsi ka basebetsi ba 328, bao hajoale ba tlang ho fetoha mekopa-kopa.

  • Share this post:
  • Facebook
  • Twitter
  • Delicious
  • Digg