Menyakoe|March 5, 2014 10:45 am

Boithabiso ba lifilimi bo tseleng

ba lifilimi- Sesotho Media

Ka Puleng Qoachela

MASERU – Batsamaisi ba lifilimi ba Sesotho Media and Development (SM&D) ba itokisetsa ho kena morerong oa boithabiso ba lifilimi ho tloha ka la 25 ho isa ka la 26 ’Mesa.
Puisanong le Mosotho Mofumahali ’Mamolefe Petlane o boletse ha morerong ona o bitsoang 48hr Film Festival e le moo ho tlang ho hlahisoa filimi e ncha ka nako ea matsatsi ao a mabeli ea Documentary and Drams. Eona e tla bapalloa batho, ’me e ipapisitse le ho ruta kapa ho hlokomelisa ka tlhekefetso ea basali, ho fetoha hoa maemo a leholimo le litaba tse amanang le tikoloho.
A re ba bile le mohopolo ona kamor’a hore ba tšoare meketjana ea ho hlahisa lifilimi, e eeng e etsoe selemo le selemo ka Pulungoana moo ba hlahisang lifilimi tse bapaloang le ho hlahisoa ke bana ba Basotho kahare ho naha.
“Re ile ra ba le tjantjello hoba re hlokomele hore bana ba Basotho ba se ba bapala lifilimi ka bongata, ’me ke ka hoo re ileng ra rata hore re eketse litsebo tsa bona le ho ba ntlafatsa tšebetsong ena,” Ke Mofumahali Petlane eo.
H’a tsoela-pele, a re morero ona oa ho hlahisa lifilimi ka lihora tse 48 o molemo haholo kaha o qholotsa boqhetseke. Ho feta moo, ba ne ba fumane qholotso ea ho se shebahale hantle hoa tsona kapa ho se be boemong ba ho bapalisoa ho latela liphoso tse bang li teng ho tsona.
A eketsa ka hore tlhahiso e-ba ngata hae mona hoo le ka nako ea ho keteka tlhahiso ea lifilimi, lenane le bang le ngata hoo ba eeng ba hloloe ho li bapala kaofela.
“Sepheo sa rona re le SM&D ke hore re lakatsa ho bona moruo oa tlhahiso ea lifilimi e-ba o holimo,” ho rialo Petlane.
A boela a re sena se ka pakoa ke ka moo ho bapaloang lifilimi le libaesekopo seea-le-moea-ponong sa kahare ho naha.
“Ka hoo, sena se ba khothatsa haholo ebile se etsa hore ba be le matla holim’a seo ba neng ba ntse ba e-na le thahasello ho sona,” a rialo Petlane.

  • Share this post:
  • Facebook
  • Twitter
  • Delicious
  • Digg