Khoebo, Litaba|March 5, 2014 10:42 am

Bahoebi ba thakelana malebela

Bahoebi kopanong ea ho fanana ka malebela

Ka Napo Lekhooana

MASERU – Lekala la Khoebo, Likoporasi le Limmaraka le ile la ba le kopano ea ho thakelana malebela le bahoebi ba bahlahisi ba lijo ka temo.
Temo e neng e shebiloe haholo ke ea lijo-thollo, meroho le litholoana. Kopanong ena, bahlahisi ba ile ba eletsana ka hore hangata pele ba ka qala ho lema, ba lokela ba ele hloko hore na ba lemela mang. Ba re ba shebe hore esere ha ho le tjena eaba lihlahisoa tsa bona ha li rekoe, ’me tsa senyeha ke ho nka nako e telele polokelong ea tsona.
Chebelo-pele eo ba e entseng e bile hore khoebo e bonahalang e salletse Basotho ke ea mobu kaha tse ling likhoebo li se li hapuoe ke melata, ’me ka hona ba sebelise mobu. Ba supa hore ba tlameha ho hokahana hobane ba kena tlholisanong le bahlahisi ba Afrika Boroa bao lihlahisoa tsa bona li kenang kahare ho naha khafetsa le hona ka bongata. Ka hona, seo se ba hata torong.
Qholotso e kholo eo ba tobaneng le eona e teng kahare ho naha, eo ba ileng ba e nyatsa ka ho fetisisa ke ea bahlahisi ba kenang ’marakeng ka tjotjo. Ba supa hore bahlahisi ba joalo ba lokeloa ho nkeloa likhato tsa molao hoba seo se senya ’maraka ka tsela e khethehileng.
E ’ngoe taba eo bahlahisi ba ileng ba e tšohla le ho e sheba ka leihlo le nchocho, ke taba ea lihlahisoa tse felang har’a nako kahare ho naha. Ba re taba eo, e ke ke ea emisa hore Basotho ba tšepele lihlahisoeng tsa bona.
Ho feta moo, ba hlahisa taba ea hore ’muso o lokela ho ba tšehetsa ka lichelete molemong oa ho lema lijo ka bongata. Ba re ho haella hoa lichelete ho lebisa temong e sa phethahalang.
Motsamaisi oa thupelo ho hlaha Lekaleng la Khoebo Monghali Tšabo Foka o re lithupelo tse kang ena li reretsoe ho fa bahlahisi ba Lesotho morolo le tjantjello ea ho sebetsa ka thata.
“Haesale re qalile ho etsa likopano tsena tsa mofuta ona re le lekala, re bone mebaraka e ’maloa e hola, ’me hoa ipakahatsa hore ha re ka ra tšoara ka thata ra tiea, ho na le moo re eang,” Foka o rialo.

  • Share this post:
  • Facebook
  • Twitter
  • Delicious
  • Digg