Menyakoe|February 17, 2014 12:28 pm

T-Connexion e itokisetsa leeto

T Connexion-img-3-big

Ka Puleng Qoachela
MASERU – K’hamphani ea bohahlauli, T-Connexion e boitokisetsong ba ho tšoara sehopotso sa leeto la ho tloha Menkhoaneng Butha-Buthe ho ea Thaba-Bosiu ka la 7 ho isa la 9 Tlhakubele.
Ka leeto lena T-Connexion e hopotsa Basotho ka phallo ea mothehi oa bona mofu Morena Moshoeshoe oa Pele le sechaba sa hae ho tloha Menkhoaneng ho ea Thaba-Bosiu lilemong tse ngata tse fetileng. Ka hona, sechaba sa Basotho kantle le kahare ho naha se tla ba boikhopotsong bona ka sepheo sa boithapollo, ho ithuta le ho chorisa likelello.
Leeto lena le tsebahalang ka hore ke ‘Moshoeshoe Fun Walk’ le selemong sa borobeli monongoaha. Lona ke la matsatsi a mararo. Letsatsi la pele ho tloha Menkhoaneng ho tla tsamauoa bolelele ba 31.9km. Letsatsing la bobeli e-be 54km ’me la ho qetela e-be 31,4km ho ea fihla Thaba-Bosiu.
Jobo o boletse ha leeto lena e le le ratoang haholo kaha le keneloa ke batho ba tsoang linaheng tse kenyeletsang Afrika Boroa, Jeremane le Botswana.
“Sena ke bopaki ba hore batho ba se ba utloisisa leeto lena le ho ba le lerato la bohahlauli,” ho rialo Jobo.
A re lipalo-palo tsa bahahlauli kahare le kantle ho naha li ea lekana. O itse batho ba linaha tse ling ba na le thahasello e kholo ea ho tseba nalane ea naha ena.
O re leeto lena le neng le qaloe ka 2007 le ne le atlehe ho keneloa feela ke batho ba 45.
A toboketsa ka hore hajoale ba lebelletse lenane la batho ba sa feteng 600 ha ngoahola e ne e le ba 650. A re hajoale ba ile ba khetha hore ba nke lenane leo bohle ba tlang ho khotsofatsoa ke bosebeletsi ba bona.

Puisanong le Mosotho Mofumahatsana Masingoaneng Tlali eo a kileng a ba karolong ea leeto lena ngoahola, o itse ke le thabisang haholo le bileng le lebatsang lintho tse ngata tse amanang le bophelo. A re le bile le theha setsoalle le bonngoe kaha ba tla be ba sa tsebane empa qetellong e-be metsoalle, ho feta moo le bile le ruta hore o tsebe le ho hlokomela tseo motho a neng a se na leseli la tsona. “Ke le thabela haholo, ke lakatsa ho ba teng selemo le selemo empa ke sitoa ho latela mosebetsi oa ka” a rialo Mofumahatsana Tlali.

  • Share this post:
  • Facebook
  • Twitter
  • Delicious
  • Digg