Menyakoe|February 17, 2014 12:15 pm

NUL e itokisetsa litlholisano

Ka Puleng Qoachela
MASERU – Sekolo se Seholo sa Sechaba (NUL) se itlhophisetsa ho ea litlholisanong tsa ’mino oa linoto naheng ea Soatsing ka la 7 Tlhakubele.
Litlholisano tsena li tšoaroa selemo le selemo moo lijunifesithi tsa Botswana, Lesotho le Soatsing (BOLESWA) li kopanang ka sepheo sa ho aha bonngoe le setsoalle sa ho holisa ’mino oa linoto.
Puisanong le Mosotho, motsamisi oa sehlopa sa NUL Monghali Bokang Sekonyana o boletse h’a ba eme ka thata ho itokisetsa litlholisano tsena. O re ba etsa meketjana ea lipina le lihlopha tse ling tse kholo tsa hae mona. A re bekeng e tlang ka la 23 Hlakola ba tla boela ba etsa moketjana oa lipina moo ba tlang ho thulana le sehlopha se seholo sa Maseru e leng Maseru Harmony Voices ’moho le sa Roma Melodies.
“Ona ke mokhoa oo re ikoetlisang ka oona ho ipekha hore na re hakae re le sehlopha le hona ho tla lemoha liphoso tsa rona moo e bang re fositse.” ho rialo Monghali Sekonyana

H’a tsoela-pele, o itse o batla ho bona ba e tla le moqhaka oa tlholo joalo ka ngoahola moo ba neng ba tletse thabo e khaphatsehang. Litlholisano tsa ngoahola li ne li tšoaretsoe Lesotho holong ea NUL. Moketeng oo ho ne ho hlolisanoa ka lipina tsa linoto tsa lipuo tsa Selatini le Sesotho. Sehlopha sena sa NUL se ne se atlehe ho nka boemo ba pele pineng ea Selatini ha pineng ea Sesotho se ne se hlahe bobeling.

Selemong sena ba tobane le ho tla hlolisana ka lipina tse tšeletseng sehlopha ka seng. Lipineng tseo tse peli li tla binoa ke sehlopha kaofela, ha tse ling li tla binoa ke batho ba babeli, e-be ba bararo ho latele ba robeli ho latela tsamaiso ea mofuta oo oa ’mino oa linoto.
Lipina tsena li kenyellelitse tse kang ea puo ea Senyesemane ea ‘Hallelujah chorus’ le ‘Joy to the world’ e-be ea Sesoatsi e reng, ‘Ngiyakholoa’ le ea Selatini ea ‘Soave Si ail Vento’ le tse ling.
“E se eka Molimo a ka re thusa ra atleha ho hlola lipineng tsena tsohle,” ke Sekonyana eo.
H’a lihella likhala, o itse sehlopha sena ke sa khale haholo empa lilemong tsa khale se ile sa hloka botsamaisi bo matla hoo se bileng sa thekesela. A re empa sa boela sa tsoha ka 2008 hofihlela se fumana batho ba matla joalo ka Monghali Malefetsane Mathe, eo a seng a tsoile sekolong.

  • Share this post:
  • Facebook
  • Twitter
  • Delicious
  • Digg