Lipolotiki, Litaba|February 6, 2014 1:29 pm

Balateli ba LCD b’a ferekanngoa

Tseliso Khomari aea nkileng molamu

Ka Moluoane Shale
MAFETENG – Karolo e ’ngoe ea balateli ba LCD e khukhunela lebatooa la Thaba-Phechela har’a bosiu ho ferekanya balateli ba mokha oo hore ba se khethe mokhothaletsuoa ea hloailoeng ho emela likhetho-pheto tsa monongoaha.
Ho hlahella karolo ena ea litho tsa LCD e fihla bosiu kahar’a lebatooa lena e palame likoloi ebile e sebelisa libuela-hole ho fetisa molaetsa ka tsona. Molaetsa o fetisoang ho hlahella e le o reng ho sechaba, “Nyeoe ea ntate Tšeliso Khomari le molula-setulo oa lekala la Bolikela Monghali Motlatsi Mphulanyane, eo a neng a lla ka hore mokhathaletsuoa oa LCD lebatooeng la Thaba-Phechela, Tšeliso Khomari a se ke a khethoa kaha a itebetse tlas’a khaolo ea boraro ea molao-theo oa lekhotla.”
Se seng setho sa LCD se sa ratang ho boleloa ka lebitso se bontša ha koloi ena e ema tlas’a Sekolo se Phahameng sa Tšakholo, ebe ba kahar’a eona ba ea rohakana. O re koloi ena ke ea Mphulanyane le e mong Lesenyeho oa lebatooa la Taung.
“Batho bao ha ba tsamaee motšeare, ke litsetse tsa bosiu ebile ba bolela ha Motlatsi a tlil’o hlola nyeoe eo le pele ho uoa likhetho-phetong,” ho boletse setho seo.
Se supa hore batho bana ke khale ba rerile morero ona e le hobane ba ikemiselitse ho silafatsa lekhotla.
“Baferekanyi bana ebile ho utloahala ha e se ba lebatooa lena la Thaba-Phechela feela. Batho bana ba ile ba hla ba bolela hore ba tlil’o baka mofere-fere mabatooeng ’ohle. Ha ba ipolela, ba bolela ha ba loanela lekhotla ba re ba lemosa litho ka litaba tse qhalang lekhotla. Se makatsang ke hore ba sebetsa kantle ho taelo ea komiti ea lekhotla,” ho bolela setho.
Khomari puisanong le Mosotho o ile a tiisa litaba tsena, ’me a bolela hore le eena o utloile mohoo oo o joalo oa hore ebile o tšoeroe o koalletsoe moo a teng ’me ba se mo khethe. A ipiletsa ke hona hore ba tlohelle ho thetsoa ke batho bana ba Maseru ba ntseng ba bua lintho tse tjena.
A re batho bana ba ferekanya sechaba hoba ha ba bue ’nete. O itse o ntse a le teng mona lebatooeng “ha ke e-s’o ka ba ke koalloa chankaneng.”
H’a tsoela-pele, Khomari o itse, “Ba fihla ka har’a lebatooa ka makoloi a LCD, ba apere liphahlo tsa LCD, ba letsa lipina tsa LCD, ’me ba fihla ka le reng ke ma-LCD. Ha ba qeta, ebe ba fana ka molaetsa o khahlanong le LCD kaha ’na ke mokhothaletsuoa oa LCD,” ke Khomari eo.
Tabeng ea hore ebe litaba tsa nyeoe li eme joang, Khomari o itse, “Nyeoe e ile ea huloa kamor’a hore moahloli a eletse babuelli ba molao mahlakore ka bobeli hore ha ho na nyeoe khahlanong le ’na. Molao oa motheo ke oona o neng o ntšehelitse.”
Mosotho puisanong le Motlatsi Mphulanyane o boletse hore taba ea hore ke eena ea ntseng a hoelehetsa lebatooeng la Thaba-Phechela a re ho se khethoe Khomari ha se ’nete. “Likoloi tseno tse ntseng li hoelehetsa mono ke likoloi tsa ’muso joale ha ke utloe na hobaneng batho bana ba ka re ke ’na. Hape ha ke feta mono tlas’a sekolo moo ho boleloang hore ke ne ke le teng ke ee be ke iketse ha bo-mofumahali oa ka.”
“Hona mohlang ho ntse ho thoe ke ntse ke hoelehetsa ke ne ke bile ke eme shopong e ’ngoe motseng moo le mphato e mong oa ka.” ke Mphulanyane eo.

  • Share this post:
  • Facebook
  • Twitter
  • Delicious
  • Digg