Lipolotiki, Litaba|February 6, 2014 10:53 am

Thabane o re o tla itokolla

on_TomThabane

…ebang a sa khotsofalla komiti
Ka ’Marafaele Mohloboli
MASERU – Moeta-pele oa Lekhotla la Kobo-Tata ea Basotho ebile e le tona-kholo ea ’Muso oa Lesotho oa kopanelo o re ebang a sa khotsofalla komiti e khethiloeng maobane o tla itokolla.
Tsena o li buile a le tlung ea hae ea bohlomphehi maobane motšeare oa mantsiboea kamor’a hore a khutle holong ea Lehakoe moo lekhotla la habo le neng le tšoere likhetho tsa komiti e kholo ea naha tse bonahetseng li hana ho ea pheletsong.
“Ke tiisa ke hlapanya ha ke re ke tla itokolla hoba nke ke ka sebetsa le batho ba se nang qenehelo ea mafutsana. Ke e hlakisitse le maobane ha ke bula seboka hore mang kapa mang eo e leng mohlanka oa ’muso a se emele likhetho tsa lekhotla la habo. Ea batlang ho li emela a itokolle mosebetsing pele,” ke Thabane eo.
Thabane o itse ho ea soabisa ho bona Basotho ba iphetotse linonyana tsa kahlamela-’molai ka ho lula ba rata ho boela tebe-tebeng leha ba leka ho qaolloa linthong tse ling, ’me haeba taba ea bahlanka e sale e lleloa le hona ho soloa ho tloha mebusong e fetileng, “ha ke utloe hore na hobaneng rona re ka iphapanyetsa eona.”
O tsoetse-pele ho supa hore ntho e mpe e tla lula e le mpe ho sa natsoe hore na e etsoa ke mang, ’me eena takatso ea hae ke ho bona mafutsana a ba khethileng a behiloe ka pele ka bosebeletsi bo tsoileng matsoho.
“Taba ea bahlanka ba emelang likhetho ke e buile le maobane ha ke bula seboka, empa ha kea bona ho na le tšisinyeho ea letho hore bahlanka ba lethathamong la baiketi ba hlakole mabitso a bona.”
“Ha ho ka moo mohlanka a ka sebeletsang ’muso ka nako e le ’ngoe a ba a bonahala a sebeletsa maano a lekhotla la habo la lipolotiki,” ho boletse Thabane a tibisitse maikutlo haholo.
H’a fera litaba tsa hae, o itse o sebelitse ka thata haholo le Makobo-tata a mang ho aha lekhotla lena, empa haeba ho na le batho ba ka utloang ba rata ho le bolaea ka khetho ea bona ‘ke tla amohela, ke ikele ha ka Makhoakhoeng, ke il’o itulela polateng ea ka le bana ba ka’.
E mong oa baiketi bao e leng bahlanka e bile monghali Lerotholi Pheko eo e leng Mongoli e Moholo oa Lekala la Ntlafatso ea Meralo, ea neng a iketela ho ba motlatsi oa moeta-pele oa Kobo-Tata.
Puisanong le Mosotho Pheko o supile hore a ke ke a bua letho le lengata kaha sephetho se ntse se e-so tsoe, empa o itsoelletse-pele ka ho kenela mojao ho sa natsoe taba eo ea Tona-kholo ea hore bahlanka ba se emele likhetho, ba mpe ba itokolle-pele ho moo.
Pheko o itse; “Ke ile ka kenela likhetho ’me ebang nka ka khethoa ha ke na bothata ba ho itokolla ke le Mongoli e Moholo oa lekala. Nka nyahlatsa mosebetsi oo ka itlela kahar’a komiti ntle le bothata ba letho.”
Mosotho e ea khatisong ka meso tjena sephetho se nts

  • Share this post:
  • Facebook
  • Twitter
  • Delicious
  • Digg