Menyakoe|January 27, 2014 1:59 pm

KTA e itlhopha ka matla

Ka Puleng Qoachela
MASERU-Sehlopha sa Mapantsula se ipitsang ‘KTA Revolution’ se re se tlil’o hatela-pele ka matla ho tloha mathoasong a selemo tjena.

Sehlopha sena se bopiloeng ka bashanyana ba bahlano, se ne se hape khau ka ho ba boemong ba pele litlholisanong tsa mokete oa k’hamphani ea Vodacom Lesotho oa Supestars ngoahola. Sehlopha sena se re se itokiselitse ka matla le selemong sena ka talenta ea sona ea ho thenthetsa.
Puisanong le Mosotho e mong oa sehlopha Teboho Mohapi o boletse ha ba se ba tsebahala haholo ka talenta e tsoileng matsoho ea bona ea ho thenthetsa ka bokhabane. Ka hona ha ba batle ho theola seriti sena sa bona se hlomphehang.
“Hee, rea jaefa ebile re motlotlo ke hona. Ka hoo, re ntse re eme ka matla ebile a fetang a lilemo tsohle ho matlafatsa talenta ea rona le ho e fetisetsa ho ba bang ba bo rona,” ho rialo Mohapi.

H’a tsoela-pele o bontšitse ha ba se ba e-na le boiphihlelo bo boholo hoo ba ka lakatsang le ho etela linaha tse ling khafetsa joaloka ea boahisane Afrika Boroa. A re ba na le thahasello e kholo ea hore le ba nang le talenta ena kapa ba nang le lerato la eona ba ba atamele ba ke ke ba eba leqe ho ba thusa.

Sehlopha sena se sebetsang kathata tjena, litho tsa sona e boetse e ntse e le barutoana likolong tse fapaneng. Litho li re li ipha nako ea lithuto li ntse li tsoela-pele ka mosebetsi ona. Ba re ba qalile ba sa le ba nyane hape ba se na le leseli la hore na sena se ka ba tsoalla namane ea mofuta ofe. Ba supa hore empa kaha ke ntho eo ba neng ba e rata ka botebo, ba ile ba ’na ba itsoella-pele hofihlela hajoale ha ba se ba bona leseli.
Ba re ba lakalletsa ba bang ba bo bona katleho e tšoanang le ea bona, ba tiisetse ba tla fumana moqhaka oa tlholo ka le leng.
Empa leha ho le joalo, sehlopha sa bona se qholotsong e kholo ea litlhoko tse ka holisang le ho beha sehlopha maemong a ntlafetseng joaloka ho ba le liletsoa tsa boemo bo holimo, liaparo esitana le tse ling.
“Re hloka ho ba le mefuta ea liaparo e ’maloa, ’me tseo tsohle re hopotse eka reka li fihlela selemong sena,” ho rialo Mohapi

  • Share this post:
  • Facebook
  • Twitter
  • Delicious
  • Digg