Lipolotiki|January 27, 2014 11:00 am

BNP e leboha lilemo tse 20 e se pusong

Ma-BNP ha a thenthetsa (2)Ma-BNP ha a thenthetsa (2)

Ka Moluoane Shale
THABA-TSEKA- Mokha oa Sechaba sa Basotho (BNP) o re e ntse e le hantle hore ebe o ile oa emella kathoko lilemo tse ka bang 20 e se karolo ea ’muso oa Motlotlehi kamor’a ho tlosoa litulong ke sesole ka 1986.
Taba ena e builoe ke moeta-pele oa mokha ebile e le Letona la Lipapali le Teka-tekano Morena Thesele ’Maseribane, sebokeng se neng se atlehile tikolohong ea Lephoi lebatooeng la Thaba-Moea bekeng e fetileng.
“Re leboha Molimo hore ebe o ile a re soahisa hanyane hobane joale Basotho kajeno ba tseba ’nete,” ke ’Maseribane eo
A re BNP ha e re mantša-tlala e ne e le a mokha. O re mantša-tlala ke a sechaba. “Hape rona ha re qhekanyetse sechaba, mokhethoa oa rona o khethiloe ke ba fetang 1 000. Sena se bontša hore mokhethoa oa rona o eme le manyeloi,” a rialo.
O tsoetse-pele ho bontša hore lilemo tsena tseo e sa leng ba se pusong, o ithutile litšotleho tsa sechaba sa Basotho. “Ha ke tsebe le hore litsi tsa ntlafatso li ntse li le teng kamor’a lilemo tse 20 re se pusong. Monna eane ea neng a sa khafe joale kajeno ke eane o se a khafela ka nq’ane ho Afrika Boroa. Banna ba limmaeneng ba ne ba khafela ka mona ka hare ho naha. Monna a tsamaea le mofumahali oa hae a ea mane ‘Enerisi’ (NRC), ba il’o lokolla chelete eba ba tla leba hae ba kakatetse thepa. E seng hajoale ha ba se ba khafela ka mane joale banna ba se ba tsamaea le bana ba itlotsang ka lintho tse khubelu melomong.”
O ile a bontša hore Basotho ke lipaki hore pehellong ea bona kathoko, naha ea Lesotho e ile ea lahleheloa ke libanka tsa naha. “Ha ke lihlong hore banka ea temo e entsoeng ke Maneshenale moo le neng le il’o chencha chelete ha le tsoa rekisa boea ha e sa le eo. Ebe re tla ba naha e joang e se nang banka ea eona?”
A re moraong ona Basotho ba seboko ka hore ha ba ile ba beha licheletenyana tsa bona bankeng hore ba tle ba li sebelisetse ho isa bana likolong, ha ba re ba il’o li lata ba fumana li se li nyametse.
“Rona ba BNP re ntse re tsitsitse ka ho aha banka tsa Lesotho,” a rialo.
’Maseribane o boletse hore joale kajeno bona ke lipaki. “Hee! Re utloile ha motho a leqetsa, ha ho kena likamele lebakeng la hore ho kene liphoofolo. ’Me o ne a entse ntho e ntle empa re ipotsa hore na ha ho se lehoatata moo ebe tsona li tlil’o lula kae. Le bokoeta bona bo bokana bo re makalitse le likereke tsena tsa lihele. Joale nako e fihlile ea hore Basotho ba khethe BNP hore mathata ana ao re a boneng le ’ona a ke a ee ka theko.”
Mokhethoa oa BNP ea tla be a emetse likhetho lebatooeng la Thaba-Moea ke Monghali Khasoane Matsemela.

  • Share this post:
  • Facebook
  • Twitter
  • Delicious
  • Digg