Lipolotiki|January 27, 2014 10:54 am

Baithuti ba kopa phallelo ea lijo ho DC

on_news-makoa1

Ka Moluoane Shale
MASERU- Lekhotla la Puso ea Sechaba (DC) le ile la phallela ka lijo baithuti ba koetlisong ea botichere ba neng ba le tlokotsing ea ho bolaoa ke tlala sekolong sa koetliso ea matichere sa (Lesotho College of Education) Maseru.
Baithuti bana ke ba neng ba lokela ho qala lithuto tsa bona tsa selemo sa pele lenaneng la thuto ea matichere a seng a ntse a le tšebetsong (DTEP). Ho phalleloa hona ho tlile kamor’a hore baithuti bao ba kope thuso ho DC.
Raliphatlalatso oa DC Monghali Serialong Qoo o re o ile a fumana mohala ho tsoa ho baithuti ba lenane la DTEP hore ba thusoe ka lijo. “Baithuti ba ile ba bolela hore ha ba fihla ka sekolong ho qala lithuto tsa bona, ba ile ba bolelloa hore lenaneo le joalo ha le sa tla tsoela-pele. Ke moo ba ileng ba bolela hore kaha ha b’a itherisetsa ho khutlela mahae, ba kopa hore mokha o mpe o ba phallele ka lijo kaha joale ba bang ba baithuti ba se ntse ba kena lipetlele ke tlala.”
Qoo a re baithuti ba neng ba kopile thuso ea lijo ke ba tsoang seterekeng sa Mokhotlong, ’me o ile a kopa bakhethoa ba setereke seo hore ba kopanye matsoho ele hore bana bao ba fumane lijo. O re sethathong ba ne ba hlile ba lo thusa ba Mokhotlong feela.
“Empa ha re fihla moo, re ile ra bona mehau hoo re qetelletseng re fa bohle ba hlokang thuso,” a rialo Qoo.
O tsoetse-pele ho bontša hore eena le bakhethoa ba bang, ba tla thusetsa ka lijo tseo ho fihlela bakopi ba tsona ba se ba fumane thuso. “Re tla lula re ntse re ba phallela ho fihlela ba bolela hore ha ba sa hloka thuso ea rona. Ebile honajoale ho se ho bile ho e-na le baithaopi ba bangata ba tlisitseng litlatsetso. Lijo tseo re fanang ka tsona li kenyelelitse mahobe, setampo, boroso le tse ling tse ngata. Re li isa mantsiboea hore ba tle ba li sebelise le letsatsing le hlahlamang.”
Leha ho le joalo, Qoo o boletse hore ketso ena ea mohau ha e-ea thabisa letona la thuto ebile e le mokhethoa oa mokha oa Puso ea sechaba ka sechaba Mofumahali
’Makabelo Mosothoane. “O ile a bua ho se seng seea-le-moea hore ha re fepa bana ba Basotho rea iketa empa bonneteng e le baithuti ba re kopileng.”
Puisanong le Mosotho, Mosothoane o boletse hore h’a bolela mokha ka lebitso empa ’nete ke hore o boletse hore batho ba lipolotiki ha ba ntse ba e-ea moo ho baithuti ba ea ba ferekanya.
“’Nete bona re ntse re ba bona ha ba ea moo ho ba isetsa lijo tseo,” a rialo.
Lekala la Thuto le ntšitse polelo bekeng e fetileng e supang hore ke baithuti ba ka bang 400 ba neng ba lokela ho qala selemo sa bona sa pele sa lithuto tsa DTEP ’me le sola boemo bona bo etsahetseng sekolong moo.
A re ho amoheloa hoa baithuti ba bacha ba DTEP ho ile hoa fanyehoa ka 2013. Hajoale lekala le ntse le itokisetsa ho fa baithuti ba ka bang 3, 000 ba sa sebetseng ba sa tsoa phethela lithuto tsa bona mosebetsi.
Baithuti ba se ba bile ba ile khotla ho tseka hore ba fuoe tokelo ea bona ea ho rutoa. E mong oa komiti ea nakoana ea baithuti bana, Monghali Relebohile Ntele, o boletse hore ntlha-kemo ea bona ke hore joaloka baithuti ba phethetseng tse hlokahalang hore ebe motho o bitsoa moithuti oa LCE, ba fumane thuto e joalo.
“Re ile ra fumana taelo ea lekhotla e laelang lekala le sekolo hore re se boele mahae ho fihlela litaba tsa rona li sebelitsoe. Hajoale nyeoe e ntse e tsoela-pele,” ke eena eo.

  • Share this post:
  • Facebook
  • Twitter
  • Delicious
  • Digg