Lipapali|December 17, 2013 5:02 pm

Ba thenese ba il’o e hlanaka Botswana

Ka Napo Lekhooana
MASERU – Libapali tsa thenese li tla leba Botswana ka la 5 Pherekhong isao, e le ho ea bapala tse phunyeletsang ho ea litlholisanong tsa linaha tsa Afrika.
Litlholisano tsena li tla tšoareloa naheng ea Kenya ka khoeli ea Tlhakubele hona isao.
Lipapali tsena li tl’o keneloa ke linaha tse hlahang Afrika e ka Boroa, ’me linaha tse tlang ho tsoelella ke tse tla ea kopana le linaha tseo le tsona li tla beng li hlotse ho hlaha tkolohong ea bo tsona.
Libapali tse il’o kenela lipapali tseo tsa ho phunyelletsa tsa ba lilemo li katlase ho 15, ke Pukutla Motlojoa le Khetla Khetla ’me hona mokhahlelong oo, ha hona banana. Athe ba katlase ho lilemo tse 14 e tla ba Nyathi Motlojoa, Lehlohonolo Motsamai le Tšenolo Makibi ebile e le eena feela ngoanana mokhethoeng oo.
Ha e le mokhahlelong oa ba lilemo li katlase ho tse 12, bona ba tla ea Botswana ’moho le ba bang ho ea bapala fela e le mokhoa oa ho itloaetsa lipapali tsa mofuta o joalo. Bona ka lehlakoreng la bashemane ke Mpalleng Sempe le Thahane ’Mokose. Ka lehlakoreng la basetsana ke Nthabiseng Mohapi.
Mokoetlisi oa papali ena Mojalefa Mothibe, ’moho le mphato oa hae ’Nana Senatla, e leng bona ba ntseng ba eme ka thata ho utulla papali ea thenese ka hare ho naha, ba hlalositse ba le mothating oo ba emeng ka thata mabapi le ho otla libapali.
Mothibe ea sa tsoa fumana lengolo la hae la bokoetlisi ho hlaha naheng ea Spain, o re e tla be e se la ho qala a isa libapali ho ea loanela naha. Joalo ka pejana ha a ile a ka a ntša libapali ’me tsa hlola. O re ke ’nete h’a e-s’o tsoe ho ea emela lipapali tsa ho phunyeletsa joalo ka tsena tseo a tlang a li tobile empa o tiisa hore mosebetsi oa papali o tla etsoa nakong eo ba fihlang Botswana.
“Ho sebetsa ka thata ka ’nete rea sebetsa e le ho bona hore re na le libapali tse nang le boitsebelo ba papali. Empa e le hore bothatanyana bo teng ke ba hore ha re eaka ra ba le lipapali tseo re ka reng ke tsa boikoetliso tseo ekabang mohlomong li hlaha kantle,” ho rialo Mothibe.
O rialo a hlalosa hore h’a bone hore ebile papali tse joalo li tla ba teng pele ba ea Botswana kaha nako e setseng pele ho moo e se e lekane motinyane. O bile a supa hore ho ne ho kaba bohlokoa haholo ha e ne e ba ba ile ba ba le tsona litlholisano e le ho ka ikala boemo ba bona pele ho litlholisano.

  • Share this post:
  • Facebook
  • Twitter
  • Delicious
  • Digg