Menyakoe|December 17, 2013 4:45 pm

’Mino oa bolumeli o’a ntlafala

IMG_2573

Ka Puleng Qoachela
MASERU-Monate e bile o hlollang phirimaneng ea Labohlano ha libini tsa ’mino oa khumamelo li ne li nyakallatsa barati ba ’ona.
Tsena tsohle li etsahetse holong ea AME, Maseru, moo ho ileng hoa lubeha nakong eo libini tsa naha kopanong le tsa Afrika Boroa li neng li tsanyaola sa litsoere mohlakeng.Sebini ka seng se ne se bina hoblatela hore na se ka khotsofatsa letšoele joang, ka boitelo bohle.
Ba neng ba nka karolo ebile Tumelo Letoao, Paul Lewake, Katleho Moshe, Molupe Ngateng, Majara, Mosito Sentšo, Justice Mofoleng, Sekhohola Nkunyane, le Makoanyane Ntlama ha ba kantle ho naha e bile Joey Mofoleng, eo ebileng eleng mora oa eena Justice, Omega, Papane le Sello Malete oa khalala ea mehleng eseng e hlokahetse, Sammy Malete.
Hajoale libini tsa lehae li bonahatsa boiphehlelo bo boholo karolong ea ho bina. Mosito Sentšo eo e boetseng e le sebini sa ’mino oa Afro jazz, o ile a beha melamu fatše ka lipina le meretheto ea hae e ileng ea thulanya batho ka lihlooho ke ho utloa monate oo o tsoelellang, ha ane a bina tse kang “Lerato la Jesu le ea makatsa.”
Tšehetso ebile e matla ea Basotho bao ho bonahetseng ’mino ona o thopothetse ha monate lipelong tsa bona. Ba ile ba itsukutla hore ba felloe. Empa ka ho fetisisa sena se bontšitse kholo ea libini tsa lehae ’minong, kaha tse ling tsa libini tseo li neng li sa nke karolo li ileng tsa iponahatsa moo, joalo ka Khahliso Mphephuka.
Puisanong le Mosotho e mong oa bahlophisi ba moketjana ona Katleho Moshe, o supile ha sena se sa atleha ho latela takatso ea bona kaha ba liehile ho fumana sebaka sa moo bat la binela teng ’me sena sona sa khina papatso ea mokete ona esale ka nako ka ha joale le meketjana e batla e le mengata ka nako ena.
A re le ha ho le joalo o bona boiphihlelo bo boholo ba libini tsa lehae kaha li se li atleha ho bina ka botsona ntle le ho bina li etsisa letlapeng la bona.
Ha re ka hopola monna enoa (Katleho)ke e mong eo e leng khale a le teng ka har’a ’mino ona. E kile ea eba e mong ea binang moketeng oa sea-le-moea sa Afrika Boroa Leseli fm. Ha joale one a bina lipina tse hlabosang tsa letlapa la hae le lecha, lona ke ‘Tšepa Jesu.’
Libini tsa Afrika boroa li bontšitse li e-na le thahasello e kholo ea ho etsa mekete ea lipina le libini tsa lehae kaha sepheo e le se le seng sa ho boka Molimo. Pina e reng ‘ke holisitse bana’ ke e ’ngoe ea tse ileng tsa ratoa, eona e binoa ke Sello Malete e le ea ntata’e.

  • Share this post:
  • Facebook
  • Twitter
  • Delicious
  • Digg