Lipolotiki, Litaba|December 17, 2013 4:08 pm

Apesi o jaha moqhobi

mlongela
Ka Lebohang Makhakhe
MASERU – Ho nkha hoa lephoka la tello ho renang lipakeng tsa Motlatsi oa letona la Thuto le Koetliso Apesi Ratšele ebile e le mokhethoa oa Mechachane # 1 tlas’a sekhele sa LCD le moqhobi oa hae Nyepetsi Mlongeni ho haufi ho fela.
Ho ea ka Ratšele puisanong le Mosotho o bontšitse ha e le khale a hlokomelisa Mlonqeni ka tšebetso ea hae e mpe kaha e le motho ea nyamelang ka nako ea mosebetsi, ea sa laoleheng a bileng a mo tella.
“Empa e nkoatisitseng ka ho fetisisa ke ea hore e be Mlongeni o bua leshano ka hore o ne a ile ngakeng ka la 24 Pulungoana, empa a ne a sa ea, a ile sebokeng sa LCD lebatooeng la Likhetlane,” ke Ratšele eo.
“Ka la 23 Pulugoana, Selibe Mochoboroane o ile a ntetsetsa a re o kopa ke mo thuse ka koloi le moqhobi oa eona letsatsi le hlahlamang ho ea Thaba- Pechela, empa Mlongeni o ile a re oa kula a ba a nkopa linomoro tsa ngakeng moo a neng a lakatsa ho ea teng, ” ke Ratšele eo.
Leha ho le joalo, ho hlahelletse hamorao hore Mlongeni ha a ka a ea ngakeng ka ha Ratšele a re o ile a roma motho ho ea etsa tšalo morao ea hore efela eo a ile ngakeng.
Mlongeni eena o re “ke fetse ka ea ngakeng ea ka ka la 24 Pulungoana 2013, ha ke khutlile ka phetha mabaka a ka a kenyeletsang ho ea sebokeng sa LCD Likhetlane, joalo ka ha ke le le-LCD hobane ke ne ke se mosebetsing ka tumello ea hae.”
Mlongeni o boela a supa hore ha ho ntho e mo makatsang ha a utloa hore Ratšele o tl’o mo leleka ka ha a kile a mo bolella sefahla-mahlo hore o mo hirile ka phoso ka ha a ne a batla ho sebetsa le motho oa lebatooa la habo.
“Esale re sa sebetse le ntate Apesi hantle ho tloha likhoeli tse tšeletseng ke qalile tšebetso.”
Litaba tsena li boela li hlahella lengolong leo Mlongeni a neng a le ngolletse Ratšele e le ho fana ka mabaka a ka etsang hore a se lelekoe mosebetsing.
Lengolong o ne a bile a phethela ka hore o tla amohela qeto e ’ngoe le e ’ngoe eo Ratšele a tlang ho e nka.
Ka Moqebelo, Ratšele h’a bua le Mosotho o itse “Re fihlile moo re ke keng ra tsoela-pele ka mosebetsi oa rona le eena, hoseng fela ka Mantaha ha ke fihla mosebetsing ke mo fa lengolo la teleko a tsamaee.”
Ratšele o itse ho nepahetse hore ebe o ile a ea sebokeng joalo ka ha ehlile e le LCD joalo ka ha a bolela empa o khenetse hore ebe o mo thetsitse ka hore a re o ne a ile ngakeng.
“Mlongeni ke motho ea itaolang a sa laoleheng, a ikelang moo a ratang ka nako ea mosebetsi,” ho boletse Ratšele.
“Ho ne ho bile ho sa hlokahale le hore ebe ke file Mlongeni monyetla oa ho mpha mabaka a hore na hobaneng nkekeng ka mo leleka, ke ne ke mpa ke iketsa le ‘gentle man’(motho).
H’a fera Ratšele o re “polotiki ea ka le ea hae li fapane, Mlongeni o ne a fapane hole le baqhobi ba khannelang matona, o ne a araba mohala oa hae ke le teng a bile a roaka matona a mang le ho a bitsolla a a hobosa.”
O bile a re o ne a ngotse marangrang a facebook hore ba bang ba ntse ba rotela lieta Thaba-Phechela koana moo eena Apesi a neng a le hona teng.

  • Share this post:
  • Facebook
  • Twitter
  • Delicious
  • Digg