Lipapali, Litaba|November 25, 2013 4:26 pm

‘Phafane o khahloa ke bobolu ba FIFA’

Salemane Phafane

Ka Napo Lekhooana
MASERU – Lekala la Tekano, Bacha, Lipapali le Boithapollo le re molula-setulo oa mokhatlo oa Lesotho oa Papali ea Bolo ea Maoto (LeFA), Akhente Salemane Phafane le karoloana e ’ngoe ea komiti ea mokhatlo oa lefatše oa papali ea bolo ea maoto FIFA ba bolile.
Sena se hlalositsoe ke Mongoli e Moholo oa lekala, Dr Majara Molapo, a eme lebitsong la lekala ’mokeng oa baphatlalatsi ba litaba o bileng ka Labohlano.
Molapo o ile a hlalosa ha Phafane ’moho le FIFA ba e-na le bobolu boo ba ke keng ba bo lumella ho kekela ka har’a naha. Lekala le bile la latola bosehla hore le kile la ngolla FIFA, ka hona Phafane a khaotse ho thetsa sechaba ka ho ’na a re Lesotho le tla behelloa ka thoko lipapaling.
Molapo o hlalositse le ho fana ka nalane ea bobolu boo FIFA e ’nileng ea bo etsa ka nako e fetileng, ’me e bo etsa linaheng tse ling tsa mose-ho-maoatle le tse ling tsa Afrika. A teha mehlala ka linaha tseo e leng mahlatsipa a FIFA ao lipapali li ’nileng tsa rekoa, moo ho fanoang ka chelete lihlopheng e le hore li itumelle ho hloloa. O supile ha menyenyetsi ea bobolu e qalile ka la 25 Phato 2007, nakong eo ho neng ho itokisetsoa lipapali tsa mohope oa lefatše oa 2010.
“Mono ke moo Lesotho le ileng la hloloa 5-0 naheng ea Malaysia ke eona naha eo. Moo linaha tse kang Zimbabwe, Indonesia, Singapore, Lesotho le tse ling li ne li iketela ho kenela lipapali tseo. ’Me hoa rona ea ba hore re bitse LeFA le komisi ea lipapali hore re shebe esebe Lesotho le lula le hloloa tjena hoba ho rekisoa lipapali,” ho rialo Molapo.
O tsoela-pele ka hore papaling eona eo ea Malaysia, menyenyetsi e supile hore sebapali ka seng sa Lesotho se ile sa fumana M30 000. O re hoa bona e le lekala e ne e le hore ba shebe esebe bobolu bo teng athe ke moo Phafane a tla tlola a re lekala le itšunya-tšunya lipapaling.
“Ha re ikenye lipapaling ebile re ke ke ra laela LeFA hore na e bapalise libapali life. Kaha Phafane o’a itseba o na le bobolu ’moho le e mong motsoalle oa hae ea hlahang Komiting ea FIFA Geromy Velace, eo ’muso oa Afrika Boroa o ileng oa mo leleka h’a kena-kenana le lipapali tsa eona nakong ea lipapali tsa 2010. O re re mo nyatsa hoba a oela mokheng oa lipolotiki tse ling tsa mona Lesotho,” ke Molapo eo.
“Se teng ke hore sechaba se tlohelloe ho tšosoa ke Phafane mona ka hore Lesotho le tla ntšoa lipapaling. Ho teng ke hore re tseba mebuso ea linaha tse ling tse ’maloa tseo ho kenyeletsa Afrika Boroa le Russia, li ileng tsa hana bobolu boo bo neng bo etsoa ke FIFA ho tsona. Joale Phafane o batla li kene Lesotho. Eseng ’musong ona oa kopanelo,” ho rialo Molapo.
Molapo o hlalosa ha tsamaisong ea Phafane lipapali li theohile haholo ebile Lesotho le hloloa le ke linaha tseo le neng le li hlola pele. Bahoebi ba neng ba tšehetsa lipapali ba ile ba ik’hula; batho ba lahleheloa ke lerato la tsona le mabala a se ntlafale. O re ’muso ona o letšolong la ho li phahamisa boliseng ba letona le teng joale la lipapali, Morena Thesele ’Maseribane.
Molapo o re ha se ’nete hore e le lekala kapa ’muso ba kena-kenana le tsamaiso ea bolo. Ho teng ke hore letona le ngolletse LeFA, Komisi ea Lipapali Lesotho (LSRC) le komiti ea liolompiki hore ba tl’o shebisana ka ho nyotobela hoa lipapali Lesotho. “’Me Phafane kaha o’a itšoha ho latela tseo a tsebang hore o’a li etsa, ke moo a reng ’muso o kena-kenana le lipapali.
Lengolo lena leo ho buuoang ka lona Molapo o bile a le bontša baphatlalatsi ba neng ba le moo ’mokeng.
Leha e le hore pejana Phafane o ne a ile a supa ’muso o ngolletse FIFA, Molapo o re ke ka hona ba bitsitseng ’moka oo ho ka shanofatsa litlaleho tseo tsa Phafane.
“Ho teng ke hore Phafane o rata feela hore lekala le fane ka chelete ena ea Basotho ebe ha ho tšalo-morao ea hore na e entseng. Ho tšoana le ena ea hore ebe o ile a ea patalla batho hoteleng Mafeteng nakong ea boitokisetso ba likhetho. H’a qeta a ipuella ka boakhente a re batho ba na le bolokolohi ba ho fihlela moo ba ratang teng,” ho rialo Molapo.

  • Share this post:
  • Facebook
  • Twitter
  • Delicious
  • Digg